РУБРИКАТОР
Кини олоҕо - эдэр көлүөнэҕэ холобур
Василий Петрович Кайгородов диэн киһи туһунан мин кыра эрдэхпиттэн истэрим. Сэрии активнай кыттыылааҕа, уруккута колхоз салайааччыта, кэлин Саха АССР Верховнай Суутун тутаах үлэһитэ буоларын билбитим.
Нам оройуонун музейыгар хас да стендэ баар, олорго коммунист В.П.Кайгородов туһунан элбэхтик кэпсэнэр.
Кини быдан улаатан баран ликбезкэ ааҕа-суруйа үөрэммитэ. Бастакы ТОЗ-тар уонна тыа хаһаайыстыбатын артыаллара тэриллиилэригэр активнайдык кыттыбыт ыччаттартан биирдэстэрэ. Ликбез үөрэҕэ үөрэхтээх уол төрөөбүт нэһилиэгэр колхозка суотчуттаабыта, онтон салгыы Якутскайга киирэн колхозтар салайар кадрдарын курстарыгар үөрэммитэ. Ол кэнниттэн, кыратык үлэлии түһээт, салгыы үөрэнэн тыа хаһаайыстыбатын техникумун бүтэрбитэ. Ити сыл комсомол обкомун рекомендациятынан Ленинградка юридическай институкка үөрэнэ барбыта. Үһүс курска үөрэнэ сырыттаҕына эмискэ сэрии буолбута: «Сэрии! Блокада!» диэн суостаах тыллар иһиллибиттэрэ.
Студент Василий Кайгородов саллаат синиэлин кэппитэ уонна фронт будулҕаныгар киирбитэ. Сержант Кайгородов пехотнай училищены бүтэрэн, взвод командирынан 2-с Украинскай фроҥҥа сэриилэспитэ. Ол сылдьан, ССКП кэккэтигэр киирбитэ. Кини автоматчиктар роталарын командира буолбута.
Биир кылгас ыстатыйаҕа В.П. Кайгородов Ленинградтан Берлиҥҥэ тиийэ айаннаабыт бойобуой суолун толору кэпсиир кыах суох. Билигин кини түөһүн икки Кыһыл сулус орденнар, хас да медаллар киэргэтэллэр. Ол иһигэр: «Праганы ылыы иһин», «Берлини ылыы иһин» о.д.а. В.П. Кайгородов Верховнай Кылаабынай Командующайтан үс махтал суруктаах.
Рота командирын Кайгородовы сэрии бүтэрин кытта ыыппатахтара. В.П. Кайгородов эйэлээх олоххо 1945 сыл ахсынньы ыйга эрэ эргиллэн кэлбитэ. Украинаттан кэргэннэммитэ. Уонна 1946 сыллаахха дойдутугар эргиллэн кэлэн, кэтэхтэн үөрэнэн институтун бүтэрбитэ.
Итинтэн ьгла кини Саха сиригэр юридическай үлэтэ саҕаланан барбыта, бастаан юридическай оскуола директора, онтон Саха АССР Верховнай Суутун чилиэнэ.
Онтон кэлин партия ынырыытынан Василий Петрович төрөөбүт оройуонугар Намҥа тахсан колхозка өр председателлээбитэ. Ол туһунан билигин музей «Колхоз тутуутун ветераннара» диэн стендэтэ итэҕэтиилээхтик кэпсиир. 1960 сыллаахха Василий Петрович Саха АССР Верховнай Суутун чилиэнинэн хат быыбардаммыта уонна манна 12 сыл устата үлэлээбитэ. Кини билигин РСФСР персональнай пенсиятын ылар. 60 сааһын быдан аастар даҕаны, син биир уруккутун курдук, үлэ үөһүгэр сылдьар. Якутскай куорат юридическай консультациятын сэбиэдиссэйэ, эдэр адвокаттарга үтүө сүбэһит, Революция бойобуой уонна үлэ албан аатын кулуубун чилиэнэ.
Коммунист, фронтовик, үлэ ветерана Василий Петрович Кайгородов олоҕо бүтүннүүтэ эдэр көлүөнэҕэ үтүө холобур буолар.