РУБРИКАТОР
os Дураев Дмитрий Гаврильевич
1919 сыл сэтинньи ыйга Нам улууһун 2-с Модут нэһилиэгэр, быстар дьадаҥы кэргэҥҥэ төрөөбүтэ. Төрөппүттэрэ эрдэ өлөннөр, төгүрүк тулаайах хаалбыта, интернакка олорон Нам ситэтэ суох орто оскуолатыгар үөрэммитэ. Кини үлэтин 1938 сыллаахха төрөөбүт нэһилиэгин начальнай оскуолатыгар учууталынан саҕалаабыта. Дмитрий Гаврильевич 1942 сыл бэс ыйыгар Дьокуускайдааҕы педагогическай училище иккис курсугар үөрэнэ сылдьан, сэриигэ ыҥырыллыбыта. Брянскай, Калининскай, Псковскай уобаластары, Прибалтика республикаларын босхолоспута. Сэрииттэн эргиллэн кэлэн баран, Д.Г. Дураев 1946 сыллаахха комсомол Эдьигээннээҕи райкомун иккис секретарынан талыллыбыта. 1948 сыллаахха ити оройуоҥҥа партия райкомун тэрийэр инструкторскай отделын сэбиэдиссэйинэн өрө таһаарыллыбыта. Дмитрий Гаврильевич 1951-1985 сылларга пенсияҕа тахсыар диэри төрөөбүт оройуонугар эппиэттээх үлэлэри толорбута. Ол иһигэр, ССКП Намнааҕы райкомун иккис секретарынан, ССКП райкомун пропагандаҕа уонна агитацияҕа итиэннэ тэрийэр отделларын сэбиэдиссэйдэринэн уһун кэмҥэ үлэлээбитэ.
Д.Г. Дураев 1957 сыллаахха үс сыллаах уобаластааҕы партийнай оскуоланы, онтон 1962 сыллаахха ССКП КК иһинээҕи Үрдүкү партийнай оскуоланы бүтэрбитэ. Кини дириҥ теоретическай билиилээх, халбаҥнаабат идейнэй итэҕэллээх, ленинскэй принципиальность тыыныгар иитиллибит коммунист этэ. Кини тус бэйэтигэр уонна кадрдарга ирдэбиллээх, сэмэй үрдүк культуралаах үлэһит, киһи быһыытынан дьоҥҥо-сэргэҕэ ытыктанара. Д.Г. Дураев оройуон экономикатын уонна культуратын сайыннарыыга, оройуоннааҕы партийнай тэрилтэ бойобуой дьоҕурун үрдэтиигэ, үгүс сыратын биэрбитэ.
Коммунист өр сыллаах эҥкилэ суох үлэтин уонна бойобуой үтүөлэрин партия уонна правительство үрдүктүк сыаналаабыта. Кини Аҕа дойду Сэриитин I уонна II степеннээх орденнарынан, «Бойобуой үтүөлэрин иһин», «Германияны кыайыы иһин» бойобуой мэтээллэринэн, В.И.Ленин төрөөбүтэ 100 сылыгар. «Үлэҕэ килбиэнин иһин» мэтээлинэн, Саха АССР Верховнай Советын Президиумун Бочуотунай грамоталарынан икки төгүл наҕараадаламмыта. Дмитрий Гаврильевич Саха АССР норуотун хаһаайыстыбатын үтүөлээх үлэһитэ, Нам улууһун Ытык киһитэ