РУБРИКАТОР
НАМ УОЛАТТАРА СТАЛИНГРАД ИhИН КЫРГЫhЫЫГА
Егор Архипович Азаров инженернэй сэриилэри бэлэмниир чааска сыл кэриҥэ үөрэммитэ. Куурсун бүтэрэригэр киниэхэ лейтенант званиетын иҥэрбиттэрэ. Сталинград иһин историческай кыргыһыыга 57-с армия 15-с гвардейскай стрелковай дивизия сапернай взводун командира этэ. Кини подразделениета герой-куорат иһин кыргыһыы саҕаланыаҕыттан диэри охсуһуу кутаа уотугар сылдьыбыта.
Ол туһунан старшай лейтенант Е.А. Азаров 1943 сыл олунньу 22 күнүгэр аҕатыгар Архип Семеновичка суруйбут:
"Мин ааппыттан итии гвардейскай эҕэрдэтэ тутуҥ. Сылдьыы, доруобуйа этэртэн эриэккэс, сонун соччо суох. Билигин бэрт ыраах, кэтэххэ сынньалаҥҥа олоробун. Төһө да өр буоларбыт биллибэт. Кыайыы туһунан санаа бэрт үчүгэй. Тыыннаах, үөрүүнэн көрсүөхпүт диэн эрэллээхпит.
Аҕаа! Мин эйиэхэ биэрбит андаҕарбын уонна эрэннэриибин сорҕотун толордум уонна өссө инникитин толоруом. Кэпсээҥҥэ киирэр улуу Сталинград кыргыһыытыгар сылдьыстым. Мин хамаандалыыр подразделением үчүгэй сыананы ылла. Оттон миэхэ "Кыһыл Сулус" ордены уонна "Сталинград көмүскэлин иһин" мэтээли ииллилэр. Бу икки сүүнэ наҕарааданы бу ый 20 күнүгэр биэрдилэр. Бу - мин иккис төрөөһүнүм, бу - өстөөҕү өссө дьаныардаахтык кыргарга соруйар, бу - хаһан да умнуллубат күн. Манан мин сонунум бүтэр. Оҕолор доруобуйаларын харыстааҥ, сурукта суруйдуннар.
Бары аймахтарбар уонна табаарыстарбар мин ааппыттан эҕэрдэтэ тиэрдиҥ.
Эһиги уолгут Егорка".
Сэрии искусствотын баһылаабыт, элбэх кырыктаах кыргыһыыны ааспыт гвардия старшай лейтенана Азаров подразделениета Советскай Украинаны босхолооһуҥҥа кыттыбыта.
Харьковы босхолооһун, Полтаваны ылыы, Днепри туорааһын, уҥа биэрэктээҕи Украинаны, Кривой Рогу босхолуур иһин кыргыһыылар - офицер Е.А. Азаров бойобуой суола итинник. Кини командование бойобуой сорудаҕын толоро сылдьан бэйэтин эдэркээн олоҕун толук уурбута.