РУБРИКАТОР
Зырянов Афанасий Афанасьевич
(1916-1993 сс.)
Аҕа дойду сэриитин II степеннээх уордьана;
«1941-1945 сс. Аҕа дойду сэриитигэр Германияны кыайыы иһин» мэтээл;
«Кенигсберы ылыы иһин» мэтээл;
«1941-1945 сс. Аҕа дойду сэриитигэр килбиэннээх үлэтин иһин» мэтээл;
Юбилейнай мэтээллэр.
Афанасий Афанасьевич Зырянов 1916 с. тохсунньу 31 күнүгэр Нам оройуонун Үөдэй нэһилиэгэр төрөөбүт. 4 кылаас үөрэхтээх, ССКП чилиэнэ. 1932-1939 сс. «Сталин» холкуос суотчутунан, 1939 с. бу холкуос Правлениетын бэрэссэдээтэлинэн, 1942-1943 сс. Сири оҥорор оройуоннааҕы народнай комиссариат холкуоһунай отделын ревизор-бухгалтерынан. Нам райсоветын Сир салаатын инструктор-бухгалтерынан үлэлээбит.
1943 с. ыам ыйын 24 күнүгэр Дьокуускай куораттан сэриигэ ыҥырыллыбыт. Армияҕа 4 сыл 9 ый устатыгар 11 нүөмэрдээх туспа эксплуатационнай железнодорожнай полкаҕа рядовой саллаатынан путеец быһыытынан сулууспалаабыт. Афанасий Афанасьевич сэриигэ сылдьыбыт сылларын маннык ахтар: «Биһиги чааспыт сыл устата сэрии буолбут элбэх куораттарыгар тимир суол оҥоһуутугар сылдьыбыта. Онно сэрии буолбут алдьархайдарын, кыргыһыы хонуутугар мунура суох ахсааннаах элбэх киһи хаана тохтубутун, куораттар, дэриэбинэлэр умайан күл-көмөр буола сыталларын көрбүппүт.
1944 с. ыам ыйыттан от ыйыгар диэри «Великие Луки» диэн улахан станцияны, өстөөх самолета түүннэри-күнүстэри буомбалааһынын ортотугар өрөмүөннээн бүтэрбиппит. Ити курдук фронт кэнниттэн хас босхоломмут куорат, дэриэбинэ ахсын тимир суолу оҥорон Германия территориятыгар тиийэ барбыппыт. Кыайыы үөрүүлээх бырааһынньыгын Германияҕа көрсүбүтүм».
Афанасий Афанасьевич 1948 с. кулун тутар 13 күнүгэр дойдутугар эргиллэн кэлбит. Сэрии кэнниттэн Үөдэй нэһилиэгэр холкуоска суотчутунан, бухгалтерынан, сэбиэт бэрэссэдээтэлинэн өр кэмнэргэ үлэлээбит. Зырянов Афанасий Афанасьевич Нам оройуонун уонна Үөдэй нэһилиэгин Бочуоттаах гражданина.