РУБРИКАТОР
КЭРИЭСТИИБИТ КЭРЭ ОЛОХТООХ КИҺИНИ
Роман Семенович Заровняев 1915 сыллаахха Уус-Алдан оройуонун Найахы нэһилиэгэр төрөөбүтэ. Дьонунуун Нам оройуонугар көһөн кэлэн баран 1936 сыллаахха Якутскайга милиция үөрэҕэр киирбитэ. Ааллаах Үүн бириискэҕэ участковай милиция начальнигынан үлэлии сылдьаи 1941 сыллаахха Аҕа дойдуну көмүскүүр сэриигэ баҕа өттүнэн барбыта.
Бастакы бойобуой сүрэхтэниитин Ленинграды көмүскээһиҥҥэ ылбыта. 47-с стрелковай дивизия снайпера Арамаан өстөөх 70 саллаатын дойдуларыгар төннүбэт төлкөлөөбүтэ. Сталинград аттынааҕы сэриигэ бааһыран, госпиталга эмтэммитэ уонна үтүөрэн, фронт инники кирбиитигэр аттаммыта. Сталинградка фельдмаршал Паулюс армиятын төгүрүктээһиҥҥэ уонна билиэн ылыыга кыттыбыта. Советскай Армия ити улахан кыайыыта кырдьык да Гитлер күнүн киириитэ этэ.
Ити кэнниттэн Витебскэй куораты ылар иһин сэриигэ кыттыбыта. Окуопа хастан сытан үрдүнэн буулдьалар чыһыыран ааһалларын, сотору-сотору ыарахан орудиелар эстэр дорҕооннорун быыһыгар төрөөбүт алааһын саныы-саныы окуопаттан өндөс гынан көрбүтэ тэйиччи соҕус өстөөх биир бронемашината хара күдэни оргутан иһэрэ. Роман хас да гранаталары холбуу баайан кэтэһэ сыппыта. Ыстаал массыына киһи быраҕан тиэрдэр сиригэр кэлэрин кытта, ойон туран гранаталарын массыына анныгар элиппитэ. Таптарбыт кыыл өрө ходьох гына түспүтэ да өһөх хара буруонан умайбытынан барбыта.
Бу кыргыһыыга рота бойобуой ахсааныгар 25 саллаат, 2 офицер, биир бронемашина эбиллибитэ.
Ити курдук 164-с гвардейскай «Кыһыл Знамя», «Невскэй» орденнардаах дивизия өстөөх уйатын диэки баран испитэ. 1944 сыллаахха Риганы босхолообуттара. Р.Заровняев оһуобай отдел взводугар сылдьан Балтийскай муора биэрэгэр баар өстөөх тыылыгар авиационнай ыскалааттарын үлтү тэптэрэргэ бирикээстэммитэ.
Ол түгэн туһунан. Түүн, ытыалаһыы уурайбытын кэннэ, фронт линиятын оргууй сыылан этэҥҥэ туораабыттара. Хас биирдии киһи чопчу соруктааҕа - харабыллары суох оҥорооччулар биир кэмҥэ саба түһүөхтээхтэр. Ити кэнниттэн ыскылаакка миинэлэри иитэн тоҕу тэптэрэн сорудахтарын толорон, фронт линиятыгар чугаһаабыттарын кэннэ өстөөхтөр билэннэр ытыалаһан хас да киһилэрин өлөртөрөн взвод эргиллибитэ.
Гитлеровскай Германияны кытта сэрии бүппүтүн кэннэ, 1945 сыл балаҕан ыйын бастакы күнүгэр дылы Япония интервеннэрин утары сэриигэ кыттыыны ылбыта.
Биэс сыллаах сэрии устатыгар ыстыыгынан киирсиигэ түөрт төгүл - түөһүгэр уонна ойоҕоһугар баастардаах, Аҕа дойду сэриитин I степеннээх, Албан аат III степеннээх, Кыһыл Сулус орденнардаах, икки «Хорсунун иһин», икки «Бойобуой үтүөлэрин иһин», «Германияны кыайыы иһин», «Японияны кыайыы» медаллардаах Роман Семенович Заровняев дойдутугар эргиллибитэ.
Младшай лейтенант Р.Заровняев сэрии кэнниттэн урукку идэтинэн милицияҕа үлэлии киирбитэ. Аҕа дойду сэриититтэн тыҥатын икки сүрэҕин икки ардыгар хаалбыт оскуолка 1964 сыллаахха Роман Семенович Заровняев олоҕун, Мирнэйгэ үлэлии сырыттаҕына, быспыта. Кини көмүс уҥуоҕа Мирнэй куораттан үөскээбит дойдутугар Нам оройуонун Хатырык нэһилиэгэр көһөрүллүбүтэ.
А. Заровняев, сэрии ветерана