РУБРИКАТОР
ЯДРИХИНСКАЙ ФЕДОР КОНДРАТЬЕВИЧ
Федор Кондратьевич Ядрихинскай 1915 сыллаахха Көбөкөҥҥө төрөөбүт киһи. Биһиги эдьиийбит - Татьяна Кондратьевна Ядрихинская, Ленинград блокадатын кыттыылааҕын бииргэ төрөөбүт убайа.
Федор Якутскайдааҕы байыаннай оскуоланы бүтэрбитэ. Сэрии иннинэ Нам орто оскуолатыгар үлэлээбитэ. 1941 с. от ыйыгар бастакы хомуурга ыҥырыллан фроҥҥа аттаммыта. Кадровай байыаннай буолан үргүлдьү фроҥҥа барбыта, командирынан сылдьыбыта. Офицердары бэлэмниир инженернэй-техническэй училищеҕа үөрэнэн, лейтенант званиятын ылан Москва анныгар өстөөҕү утары сэриилэһиигэ кыттыбыта. Сэриигэ хорсун быһыытын иһин Кыһыл Сулус уордьанынан наҕараадаламмыта. Өстөөх самолёттарын буомбалааһыннарыгар түбэһэн, кумахха көмүллэ сытарын доҕотторо булан орообуттар уонна бэрт уһуннук госпитальга сытан эмтэнэн баран, босхолонон 1942 с. атырдьах ыйыгар дойдутугар төннөн кэлэр. Манна кэлэн Намҥа, онтон Уус-Алдаҥҥа военкомакка үлэлиир. 1944 с. Сунтаар оройуонугар КГБ начальнигын солбуйааччынан ананар. Сэриигэ ылбыт баастара көбөн хорсун буойун 1950 с. ыам ыйын 8 күнүгэр ыалдьан өлбүтэ. Кини огдообото Валентина Ивановна Зверева Нам сирин иккис төрөөбүт дойду оҥостон, Федортан үс оҕолонон билиҥҥэ диэри Намҥа олорор.
Ахтыы «Чуорааным чугдаарын хаалларан» кинигэттэн (2011 с.) ылылынна.