РУБРИКАТОР
ЛЕНИНГРАД БЛОКАДАТЫН КЫТТЫЫЛААҔА НАҔАРААДАЛАННА
Олунньу 13 күнүгэр, И.П. Сивцев аатынан Намнааҕы историко-этнографическай музейга биһиги биир дойдулаахпыт, улуус Ытык киһитэ, Ленинград блокадатын актыыбынай кыттыылааҕа Татьяна Кондратьевна Ядрихинскаяҕа Санкт-Петербург губернатора Ленинград блокадатын тохтотуу 70 сылын бэлиэтиир үбүлүөйгэ анаан олохтообут знагын туттарыы үөрүүлээх тэрээһинэ буолла.
Бу юбилейнай знагы Ытык киһибитигэр, Нам улууһун социальнай харалтаҕа уонна үлэлээх буолууга управлениетын начальнига Н.Г. Парников туттарда. Үөрүүлээх тэрээһини тэрийбит Нам улууһун ветераннарын сэбиэтин председателэ Н.Н. Баишев, Н.М. Рыкунов аатынан улуустааҕы библиотека сүрүннүүр специалиһа Р.Л. Гоголева коллектив аатыттан Махтал суруктары, сэмэй бэлэхтэри, сибэкки дьөрбөтүн истиҥник-иһирэхтик эҕэрдэлээн туран Татьяна Кондратьевнаҕа туттардылар. Ол кэнниттэн улууспут Ытык дьонноро: В.Л. Колесов (Ленскэй нэһилиэк ветераннарын сэбиэтин председателэ), И.З. Кривошапкин (улуус ветераннарын сэбиэтин президиумуи чилиэнэ, краевед), Р.С. Охлопков (улуус Ытык сүбэтин, ветераннар сэбиэттэрин президиумун чилиэнэ) ааспыты ахтан-санаан туран ытыктыыр Эдьиийдэрин эҕэрдэлээтилэр, санааны күүһүрдэр, үйэни уһатар истиҥ-иһирэх тыллары эттилэр.
Татьяна Кондратьевна сэрии, блокада ыар кэмин, оччотооҕу дьон Ийэ дойдуга муҥура суох бэриниилээхтэрин, тугу да кэрэйбэккэ хорсуннук охсуспуттарын, тыылга бэйэни харыстаммакка үлэлээн Кыайыыны уһансыбыттарын харааста, киэн тутта ахтан-санаан ылла. «Сэрии эрэ буолбатын. Бар дьонум дьоллоохтук-соргулаахтык олордун», - диэн этиинэн, алгыһынан ахтыытын түмүктээтэ.
И. Иванов