РУБРИКАТОР
Ядреев Владимир Владимирович
(1923-1998 сс.)
Наҕараадалара:
Аҕа дойду сэриитин I степеннээх уордьана;
Аҕа дойду сэриитин II степеннээх уордьана;
«Хорсунун иһин» мэтээл;
«1941-1945 сс. Аҕа дойду сэриитигэр Германияны кыайыы иһин» мэтээл;
Юбилейнай мэтээллэр.
Мин 1923 с. Нам улууһун Үөдэй нэһилиэгэр төрөөбүтүм. Үөдэйгэ 4 кылааһы, Партизаҥҥа 7-с кылааһы бүтэрэн баран 1939 с. Буденнай аатынан холкуоска үлэбин саҕалаабытым. Саҥа үөрэнэн эрдэхпинэ, Аҕа дойду Удуу сэриитэ саҕаламмыта. Сэриигэ 1942 с. от ыйыгар ыҥырыллыбытым. Балаҕан ыйыгар Иркутскай куоракка айаннаан тиийбиппит. Мальта станцияҕа артиллерийскай чааска үөрэммитим, сорохтору Арҕаа фронт диэки ыыппыттара. Биһиги, сахалар, Мальта станцияҕа элбэх этибит, онно 71-122 мм калибрдаах пушкаларга үөрэппиттэрэ. 1943 с. кулун тутар ыйга биһигини артиллерия маршала Рыбалко кэлэн үөрэхпитин туппута уонна Арҕаа фроҥҥа ыыппыттара.
1943 с. муус устарга биһиги уонча 45 калибрдаах пушкалары акка көлүйэн, I Украинскай фронт 13-с мотострелковай гвардейскай биригээдэтин састаабыгар киирэн Москва анныттан Харьков куорат туһаайыытынан айаннаабыппыт. Харьков куораты ылыыга аан маҥнай тиийэн сэриигэ сүрэхтэммиппит. Дьэ, манна алдьархайдаах кутаа уокка түбэспиппит: ньиэмэстэр таанканы кытта мотострелковай армияларын сэриилэрэ, салгынтан харса суох самолетунан буомбалааһыннара Харьков куораты олус алдьаппыта. Бу тэҥэ суох сэриигэ биһиги уолаттарбыт үгүстэрэ өлбүтэ уонна бааһырбыта.
Дергачи диэн дэриэбинэҕэ биһиги 45 калибрдаах пушкабытынан өстөөх үс тааҥкатын стройтан туораппыппыт. Аттарбытын онно өстөөх самолета үөһэнэн сылдьан тэһитэ ытыалаабыта, онон пушкаларбытын бэйэбит соһо-анньа сылдьыбыппыт. Онтон хас да хонон баран, 13-с мотострелковай гвардейскай биригээдэ тыылга сынньана тахсыбыта. Биһигини атын чаас солбуйбута. Тимир суолунан барар кыах суох буолан, биһиги чааспыт сатыы ойуурунан, хонуунан Тульскай уобалас ойууругар землянка хастан олорбуппут. Биһиэхэ эбии тыылтан саҥа чаас кэлэн холбоһон, от ыйын 1 күнүгэр диэри саҥа таҥас, сэрии сэбэ ылан үөрэммиппит. Бастаан утаа саа-сэп да тиийбэт этэ, онтон 1943 с. сайынтан ыла чынха атын буолбуппут. Самолет, тааҥка элбээбитэ, автомат дэлэйбитэ. Онон, кыайыыга эрэл улам улаатан испитэ.
1943 с. от ыйын 5 күнүгэр аатырар Курскай Дугаҕа сэриилэһэн биһиги чааспыт Шумскай уобалаһынан Курскай куораты ылан, өстөөх оборонатын тоҕо көтөн арҕаа диэки сыҕарыйбыппыт. Өстөөх туох да наһаа утарсар буолан хас биирдии үрдэли, дэриэбинэни кырыктаах сэриинэн ыларбыт. Ньиэмэстэр чутуйалларыгар хайаан да дэриэбинэни, куораты уоттууллара. Белая Церковь таһыгар мин оскуолкаҕа табыллан биир нэдиэлэ устата полевой госпитальга сыппытым. Үтүөрэн баран бэйэм чааспын булбакка 57-с таанкабай десаҥҥа автоматчыгынан сэриилэспитим. Пруд өрүһү туораан, Чернигованы ылсан, Днепри туораан Киев куораты ылыыга уулуссаҕа сэриилэһэ сылдьан кэннибиттэн автомат уочаратыттан уҥа илиибин буулдьа тэһитэ көппүтэ. Ол күнү быһа сэриилэһэн киэһэ санбатка таһаарбыттара. Кырдьык, хааным наһаа барбыт этэ. Онон, туох да сэниэтэ суох буолбутум. Мичурин куорат госпиталыгар икки төгүл наркоһунан угуттаан операция онорбуттара.
1944 с. дойдубар кэлбитим. Дойдубар кэлэн өр кэм устата биригэдьииринэн үлэлээбитим.