РУБРИКАТОР
Ядреев Алексей Михайлович
(1909-1989 сс.)
Наҕараадалара:
Албан аат III степеннээх уордьана;
«Украинаны босхолооһун иһин» мэтээл;
«1941-1945 сс. Аҕа дойду сэриитигэр Германияны кыайыы иһин» мэтээл;
«1941-1945 сс. Аҕа дойду сэриитигэр килбиэннээх үлэтин иһин» мэтээл;
Юбилейнай мэтээллэр.
Ядреев Алексей Михайлович Үөдэй Табалааҕар дьадаҥы дьиэ кэргэҥҥэ төрөөбүтэ. Ликбезкэ үөрэнэн ааҕар, суруйар буолбут. Нэһилиэк Сэбиэтин сэкирэтээринэн талыллан үлэлии сылдьан 1942 с. сайын сэриигэ ыҥырыллыбыт. 1943 с. муус устар ыйга диэри Челябинскайга байыаннай үөрэххэ үөрэммиттэр, онтон ыам ыйыттан Украинскай фронт 5-с гвардейскай армиятыгар майор Муратов салалтатынан сулууспалаабыт. Командира Алексейы хайыһарынан үчүгэйдик сүүрэрин уонна ытара үчүгэйин иһин хайыһар ротатыгар пулеметчигынан анаабыт. Элбэх кимэн киириилэргэ, 3 улахан атаакаҕа кыттыбыт. Үсүһүгэр Таганрог куорат анныгар дэриэбинэҕэ улаханнык илиитигэр бааһыран госпитальга сыппыт. Хаҥас илиитин тоҥолоҕун үрдүнэн быспыттар, онон 1944 с. олунньутугар дьиэтигэр эргиллэн кэлбит.
Киһини өйдүүр буолуохпуттан таайбын протез илиилээҕин өйдүүбүн. Кыра сылдьан киэһэ утуйарыгар протеһын уһуллаҕына, муҥур илиититтэн куттанан олох чугаһаабат этим. 5-6 сааспар: «Таай, бу илииҥ туох буолбутай, тоҕо манныгый?» - диэн ыйыппыт үһүбүн. Ону таайым: «Сэриигэ ньиэмэстэр илдьэ хаалбыттара», - диэбитин үдүк-бадык өйдүүр курдукпун, бука, куттаммыппыттан өйдөөн хаалбытым буолуо. Сэриигэ сылдьыбытын улаханнык кэпсээбэт буолара.
Кэлэн баран 1944 с. кулун тутар ыйтан холкуоска араас үлэҕэ үлэлээбитэ: биригэдьииринэн, ферма сэбиэдиссэйинэн, налоговай агенынан. 1972 с. Үөдэйгэ амбулатория тутуллуута үбэ тиийбэт диэн тохтотуллар кутталламмытыгар таайым бэйэтэ муспут үбүттэн 2000 солкуобай харчыны биэрэн, амбулатория ситэриллэн үлэҕэ киирбитэ. Ол туһунан «Ленин суола», «Кыым», оннооҕор «Правда» хаһыакка суруллубута. Онон, таайым Ядреев Алексей Михайлович Нам улууһугар маҥнайгы меценат буолуо!
Дьэ, ити курдук, сырдык, ыраас өйдөбүлү миэхэ хаалларбыта уоттаах сэриигэ геройдуу охсуспут, эйэлээх олоххо чиэһинэйдик олорбут, үлэлээбит, дьон-сэргэ сүдү ытыктабылын ылбыт тапталлаах таайым Алексей Михайлович Ядреев. Кини сырдык кэриэһин оҕолорбор, сиэннэрбэр, бар дьоммор кэпсээн үйэтитэбин.
Е.И. Неустроева