РУБРИКАТОР
ЭҺЭБИНЭН КИЭН ТУТТАБЫН
Мин эһэм туһунан кэпсиэхпин баҕарабын. Кини аата Николай Романович Хоютанов. 32 сыл устата нуучча тылын учууталынан үлэлээбит, сэрии уонна Чурапчы көһөрүллүүтүн кыттыылааҕа.
Эһэм Николай Романович Хоютанов тохсунньу 1 күнүгэр 1925 сыллаахха дьадаҥы бааһынай дьиэ кэргэнигэр төрөөбүт. Оҕо сааһа Чурапчы Төлөйүн дьэдьэннээх алааһыгар ааспыт. Сут дьыллар саҕаламмыттар. «Аччыктаан өлүөххүт, баран балыктааҥ», - диэн Кэбээйигэ көһөрүллүбүттэр. Онно айаннаан иһэн аччыктаан, тоҥон элбэх киһи өлбүт. Алтынньы ыйга кубус кураанах биэрэккэ тиксэн, аһаҕас халлаан анныгар хас да хоммуттар. Эһэм барахсан ол алдьархайы соччо кэпсиэн, саныан баҕарбата эбитэ үһү.
Аҕа дойду улуу сэриитигэр 18 саастааҕар Кэбээйиттэн ыҥырыллан барбыт. Ити кэмҥэ Япония биһиги дойдубутугар саба түһээри бэлэмнэммит. Эһэлээҕим дойду илин өттүн кыраҕытык харабыллыыр бирикээһи чиэстээхтик толорбуттар.
Мин эһэм кырасыабай, үчүгэй буочардааҕын, нуучча тылын үчүгэйдик билэрин, биир да сыыһата суох суруйарын билэннэр штабка суруксутунан анаабыттар эбит. Онтон 1945 сыл атырдьах ыйыгар Япония армиятын бэриннэрэн Аан дойду иккис сэриитигэр биһиги норуоппут кыайыылааҕынан тахсыбыт. Онно эһэм кыайыыны уһансыбытынан киэн туттабын.
1958 сыллаахха университеты бүтэрэн, ыал буолан эбэм Ульяна Александровна дойдутугар, Намҥа, нуучча тылын үөрэтэ кэлбит. Онтон ыла Нам 1 №-дээх оскуолатыгар учууталынан, завуһунан, улуус профсоюһун председателинэн үлэлээбит. Ону таһынан оскуола эргэ ГАЗ-51 массыынатынан Кэҥкэмэттэн уокка оттор мас таһан төһөлөөх учуутал дьиэтигэр сылааһы аҕалбыта буолуой?! Тыһыынчанан оҕону улуу нуучча тылыгар үөрэтэн, иитэн таһаарбыт. «Эн эһэҥ мин учууталым этэ», - диэн махтана аҕыннахтарына мин олус долгуйан үөрэбин.
Дьиэтигэр олус эйэҕэс, болҕомтолоох аҕа, эһэ этэ. Дьоҥҥо истиҥ сыһыанынан, сиэрдээх майгытынан кэрэҕэ уһуйара.
Билигин биһиги эһэбит олорбут олоҕун, кини тыынын сылааһын, кини сүрэҕин тэбиитин үс оҕото, тоҕус сиэнэ, 2 хос сиэнэ салгыыбыт, сайыннарабыт.
Сэрии уота умуллубута 70 сылын туолар үөрүүлээх сылыгар эһэбит тыыннааҕа эбитэ буоллар 90 сааһын туолуо эбит. Кыайыыны уһансыбыт хорсун саллаат, 32 сыл устата учууталлаабыт эһэм Николай Романович аатынан киэн туттабын. Мин эһэбин көрбөтөҕүм, ол гынан баран кини сэриигэ ылбыт наҕараадаларын, хаартыскаларын көрдөхпүнэ, эбэм, аҕам кэпсээннэрин иһиттэхпинэ эһэм барахсаны көрсүбүт курдук сананабын.
Коля Посельскай,
гимназия 6 кыл. үөрэнээччитэ