РУБРИКАТОР
Эверстов Конон Софронович
1930 сылааах саас Хатыҥ-Арыы нэһилиэгэр тыа хаһаайыстыбатын социалистическайдыы уларытыы үлэтэ бара турара. Билиҥҥи Искраҕа «Лэкиэс» диэн бастакы табаарыстыба тэриллибитэ. Председателинэн оччоҕо эдэр сытыы-хотуу киһи Конон Софронович Эверстов быыбардаммыта.
Чилиэннэр коллективнай олоххо түргэнник үөрэнэн, үлэ-хамнас көхтөөхтүк баран испитэ. Ити кэнниттэн икки, үс сыл ааспыта. Олох сайдыыта наһаа кыра табаарыстыбалар табыгаһа суохтарын көрдөрбүтэ. Онон кинилэр артыалларга холбоһуулара саҕаламмыта. Үс табаарыстыба холбоһон, «Искра» колхуоһу тэриммиттэрэ.
Бөдөҥсүйбүт артыал председателинэн Эверстов К.С. талыллыбыта. Кини итиннэ 14 сыл үлэлээбитэ. Конон Софронович общественнай хаһаайыстыба бөҕөргөөһүнүгэр, колхозтаахтар олохторун таһыма үрдээһинигэр элбэх сыратын биэрбитэ. Ону билигин оччотооҕу колхозтаахтар толору бигэргэтэллэр.
1950 сыллаахха «Кыһыл Дэриэбинэ», «Искра» уонна Карл Маркс аатынан колхозтар холбоһон, Карл Маркс аатынан бөдөҥсүйбүт хаһаайыстыба буолбуттара. Ити кэнниттэн 12 сыл устата Конон Эверстов комплекснай биригээдэ биригэдьииринэн, ферма сэбиэдиссэйинэн, тутуу биригэдьииринэн үлэлээбитэ. От тиийбэт, үлэһит илии аҕыйах ыарахан сыллара үгүс этилэр. Төһө да ыараханын иһин, маассаны тэрийиигэ талааннааах, дьоҥҥо тылын ылыннарымтыа буолан, көрсөр ыарахаттары кэмигэр туораан испитэ.
К.С. Эверстов - коммунист буолан, партийнай сорудах уонна итэҕэл киниэхэ сокуон. Кылгас да кэмҥэ буоллар, Ленскэй сельсовет председателинэн, Түбэҕэ колхоз председателинэн эмиэ үлэлээн сылдьыбыта.
Конон Софронович фашисткай талабырдьыттары Ийэ дойдуттан киэр үүрүүгэ илиитигэр саа-саадах тутан кыргыспыта. Фроҥна сылдьан фашистар буулдьаларыттан улаханнык бааһырбыта. Кини хорсун быһыыта «Албан аат» III степеннээх орденынан бэлиэтэммитэ. Кэлин колхознай тутуу уонна сэрии ветеранын түөһүн «1941-1945 сс. Аҕа дойду Улуу сэрииитин сылларыгар. килбиэннээх үлэтин иһин», «Германияны кыайыы иһин», «Улуу кыайыы 20 сыла» мэтээллэр киэргэтэллэрэ.
Советскай былаас 50 сылын туолуутунан сибээстээн итиэннэ колхоһу тэрийсиигэ уһулуччу үтүөлэрин иһин Саха АССР правительствота Бочуотунай грамотанан наҕаарадалаабыта.
Конон Софронович тэрийсибит колхоһугар хойукка диэри күүһэ кыайарынан үлэлээбитэ. Оттуур звенону салайа да сылдьыбыта, колхоз нефтебазатын да дьаһайбыта.