РУБРИКАТОР
Сталинграды көмүскэспитэ
Василий Степанович Винокуров 1918 сыллаахха Хамаҕатта алааһыгар төрөөбүтэ. 1933 сылтан "Кыһыл ыллык" артыал чилиэнэ. 1942 сыллаахха бэс ыйыгар Аҕа дойдуну көмүскүүр Улуу сэриигэ ыҥырыллыбыта.
Кинини уһуннук тохтоппокко, 1943 сыл кыһыныгар Сталинград көмүскэлигэр сибиряктар аармыйаларын хайыһар батальонугар анаабыттара. Түүнэ-күнэ биллибэт уот-буулдьа күдэнин ортотунан сылдьыбыттара. 1943 сыл от ыйын саҕана өстөөх төгүрүктээһинин үлтүрүтүүгэ саллаат Винокуров кыттыбыта.
Салгыы минометчик, разведчик Василий Винокуров Мариновка, Матвеев Курган куораттар иһин кыргыһыыларга хорсуннук сэриилэспитэ. Ворошиловград куораты босхолооһуҥҥа ыараханнык бааһырбыта. II группалаах инбэлиит буолан, 1944 сыл тохсунньу 18 күнүгэр дойдутугар эргиллибитэ. Василий Степанович уоттаах сэрии ортотунан сылдьан, уопсайа түөртэ бааһырбыта.
Хорсун саллаат сэрииттэн эргиллээт, Горнай наспотугар бэрэссэдээтэллээбитэ, соҕотуопка ситимигэр үлэлиир кэмигэр балыксыттар биригээдэлэрин салайбыта. Нам, Сииттэ олохтоохторун эмис собонон аһатан, бар дьон махталын ылбыта. 1954 сылтан В.С.Винокуров тутуу биригэдьиирин быһыытынан төрөөбүт-үөскээбит Хамаҕаттатыгар үгүс дьиэни-уоту туппута. Олортон бөдөҥнөрө - оскуола, Култуура дьиэтэ о.д.а. производство, олох-дьаһах эйгэтин тутуулара. Ити кэмнэргэ тутуу ыарахан үлэтин тупсарар, чэпчэтэр аналлаах, үлэ ороскуотун намтатар сыаллаах экономическай кедьүүстээх этиилэри, оҥоһуктары толкуйдаан олоххо киллэрбит рационализатор быһыытынан үрдүк сыанабылы ылбыта.
Василий Степанович Аҕа дойду Улуу сэриитигэр хорсун быһыыта, айгыраабыт олоҕу чөлүгэр түһэриигэ, сайыннарыыга үрдүк таһаарыылаах үлэтэ Албан аат, Аҕа дойду сэриитэ уордьаннарынан, элбэх мэтээллэринэн бэлиэтэммитэ. Аҕабыт, эһэбит барахсан дьоллоох олохпут чэчирии сайдарын туһугар күүһүн-уоҕун, өйүн-санаатын биэрбит, сирдээҕи олоҕун анаабыт, төрөөбүт дойдутугар, норуотугар бэриниилээх саха саарына буолар. Биһиги, оҕолоро, тымыр-сыдьаан ыччат дьоно кининэн киэн туттабыт, кини аатын үйэлэргэ ааттатар ытык иэстээхпитин умнубаппыт.
Кыыһа Любовь Васильевна ахтыытыттан
Александр ДУНАЕВ суруйда.