РУБРИКАТОР
СТАЛИНГРАДЫ КӨМҮСКЭСПИТЭ
Василий Степанович Винокуров 1918 сыллаахха Хамаҕатта алааһыгар төрөөбүтэ. 1933 сылтан «Кыһыл Ыллык» артыал чилиэнэ. 1942 сыллаахха бэс ыйыгар Советскай Армияҕа ыҥырыллыбыта.
Кинини уһуннук тохтоппокко 1943 сыл кыһыныгар Сталинграды көмүскэһэр сибиряктар армияларын хайыһар батальонугар анаабыттара. Батальон оборонаҕа сытан Сталинграды төгүрүйэ кэриэтэ үс метр дириҥнээх, алта метр кэтиттээх ханаабаны хаһыспыта.
Өстөөх түүн-күнүс өрөөбөккө үөһэттэн-аллараттан биир кэм ытыалаан тиҥийэрэ. Күнэ-түүнэ биллибэт күдэрик ортотунан сылдьаллара, сир-халлаан кута курдук күегэҥнэс этэ.
1943 сыл от ыйын саҕана өстөөх оборонатын үлтүрүтүүгэ саллаат Винокуров сылдьыбыта. Ситиһиилээх бойобуой операция иһин кинилэр чаастарыгар - 4-с гвардейскай Сталинградскай мотомеханизированнай корпуска - махтал биэрбиттэрэ уонна сынньата таһаарбыттара.
Итиннэ автоматчигынан сылдьыбыт Василий Степанович сынньалаҥ кэнниттэн Мариновка диэн кыра куораты босхолуур иһин өстеех күүстээх оборонатын үлтү сынньыыга минометка наводчик буолбута.
Ростовскай уобаласка Матвеев Курган диэн куораты босхолооһуҥҥа биһиги байыаспыт разведчигынан сылдьыбыта. Куорат үрдэлгэ олороро. Өстөөх киэҥ сири миналаабыт этэ, ону ыраастааһыҥҥа кыттыбыта. Күүстээх оборонаны тоҕу көтөн өстөөҕү үүрбүттэрэ.
Ворошиловград куораты босхолооһуҥҥа ыараханнык бааһырбыта. II группа инбэлиит буолан 1944 сыл тохсунньу 18 күнүгэр дойдутугар төннөн кэлбитэ. Василий Степанович уоттаах сэрии ортотунан сылдьан уопсайа түөртэ баас ылбыта.
Горнай наспотугар председателлээбитэ Соҕотуопкаҕа үлэлии сылдьан балык биригээдэтин тэрийэн, бэйэтэ салайан Лаабыдаттан эһэр балыгы хостоон бүтүн Намы уонна Сииттэ дьонун эмис собонон аһатан бар-дьонтон махтал ылбыта.
1948 сылтан Ленин аатынан колхозка сылгыһыттыыр, атын да үлэҕэ сылдьар. Тутуу кэскилин санаан колхоз бырабылыанньата кинини биир сыллаах прорабтар курстарыгар үөрэххэ ыытар. 1954 сылтан тутуу биригэдьиирэ В.С. Винокуров Хамаҕаттаҕа үгүс дьиэни-уоту тутта. Олортон бөдөҥнөрө - оскуола, культура дьиэтэ о.д.а.
Тутууга үлэлиир кэмигэр ыарахан үлэлэри чэпчэтэр рационализаторскай хас да оҥоһуктары олоххо киллэрэн үлэлэтэн отделениеҕа производственнай ороскуоту аҕыйатарга кини өҥөтө элбэх.
Василий Степанович Винокуров, сэрии, үлэ ветерана - биһиги дьоллоох олохпут чэчирии сайдарыгар бары күүһүн-уоҕун, өйүн-санаатын, сыратын биэрбит дьоннортон биирдэстэрэ.
И. Мокрощупов,
Хамаҕатта