РУБРИКАТОР
БОЙОБУОЙ ҮТҮӨЛЭРДЭЭХ
Петр Афанасьевич Винокуров Никольскайга колхозка үлэлии сылдьан 1942 сыллаахха Советскай Армия кэккэтигэр ыҥырыллыбыта. Владивостокка 488 стрелковай полкаҕа эдэр байыастары бэлэмниир курсу барбыта. Онтон Арҕаа фроҥҥа атаарыллыбыта.
Ити сыл атырдьах ыйыгар Сталинград арҕаа өттүгэр Калач куорат таһынааҕы кыргыһыыга кыттыбыта. Ити кини бастакы бойобуой сүрэхтэниитэ этэ. Билигин Петр Афанасьевич биир маннык түбэлтэни кэпсиир:
- Биир киэһэ батальон командира миигинниин биэс саллааты ыҥырбыта. Онно фронт линиятын туораан «тыл» ыларга уонна сыаналаах докумуон буоларга сорудахтаабыта. Киэһэ хараҥаҕа фронт линиятын туораабыппыт. Биир кыра үрэх үрдүгэр турар дьиэҕэ немецтэр баалларын билбиппит. Онно сыылллан тиийбиппит уонна хас даҕаны гранатаны бырахпыппыт. Онтон түөрт буолан саба сүүрэн тиийбиппит. Дьиэҕэ икки бааһырбыт киһи сытара. Күөрэ-лаҥкы түспүт дьиэ тэрилин быыһыттан немецкэй планшеттары булбуппут. Сарсыарданан фронт линиятын этэҥҥэ туораабыппыт уонна чааспытыгар сыаналаах докумуоннары аҕалбыппыт.
Ити түбэлтэҕэ көрдөрбүт хорсун быһыытын иһин П.А. Винокуров «Бойобуой үтүөлэрин иһин» медалынан наҕараадаламмыта. Ити кэнниттэн сотору атаҕар улаханнык бааһыран госпитальга киирбитэ. Онтон кулун тутарга тахсыбыта уонна иккиһин фроҥҥа ыытыллыбыта.
Кини онус оһуобай техническэй рота састаабыгар саперынан сулууспалаабыта. Итиннэ сэрии бүтүөр диэри сылдьыбыта. Ити рота Днепри туоруур муоста туппута. Өстөөх ытыалааһынын уонна бомбалааһынын ортотугар сылдьан саллааттар ити үлэни кэмигэр толорбуттара. П.А. Винокуров иккиһин «Бойобуой үтүөлэрин иһин» медалынан наҕараадаламмыта.
П.А. Винокуров Румынияны, Чехословакияны босхолооһуҥҥа кыттыбыта уонна Австрия сиригэр тиийбитэ. 1945 сыллаах сэтинньигэ дойдутугар төннүбүтэ.
Ол кэмтэн ыла шофердыыр. Эйэлээх кэмҥэ үрдүк таһаарыылаах үлэтэ «Тыа хаһаайыстыбатыгар социалистическай куоталаһыы туйгуна», «Аварията суох сылдьыы» II степеннээх значоктарынан бэлиэтэннэ.
Н. Новгородов