РУБРИКАТОР
Винокуров Кирсан Петрович
(1926-1988 сс.)
Наҕараадалара:
«Японияны кыайыы иһин» мэтээл;
Юбилейнай мэтээллэр.
Кирсан Петрович 1926 с. Нам оройуонун Хатыҥ Арыы нэһилиэгэр сэниэ ыалга төрөөбүтэ. 1942 с.
Нам орто оскуолатын 7-с кылааһын үөрэнэн бүтэрэн баран аҕатын батыһан Үөдэйгэ кэлэн сылгы көрүүтүгэр үлэлиир. 1943 с. Покровскайга 1 ыйдаах снайперскай кууруска, 1944 с. Намҥа парашютист-десантникка үөрэнэр уонна 1945 с. атырдьах ыйын бүтүүтүгэр армияөҕа ыҥырыллар. Кытай кыраныыссатын таһыгар Маньчжурияҕа 77-с разъезд 91-с туспа оккупационнай ротатыгар ананар. Ол кэмҥэ Японияны кытта сэрии буолара саарбахтаммат этэ. Өр-өтөр буолбатаҕа, японецтар балаҕан ыйын саҥатыгар Кытай кыраныыссатын туораан Хайлар туһаайыытынан кимэн киирбиттэрэ. Кирсан Петрович кырыктаах кыргыһыы кэмигэр Хинган сис хайаларын туораан, Харбин, Мугден, Фушуш уо.д.а. куораттары босхолоспута. Япония сэриитин үлтү сынньыы кэнниттэн билиэн түбэспит саллааттары конвойдааһыҥҥа сылдьыбыта. Ол туһунан Кирсан Петрович маннык ахтар: «Харбин, Гангут, Мундек, Орутунь, Муденжаш куораттарынан сылдьан сулууспалаабытым. Тимир суолу харабыллааһын, суолу, дьиэлэри чөлүгэр түһэриилэригэр билиэннэй японецтары конвойдаан үлэлэтии, харабыллааһын биһиги эбээһинэспитигэр киирэрэ. 1946 с. ыам ыйыгар Союзена Борьзя станцияҕа сайын устата сулууспалаан баран, ити күһүн балаҕан ыйыгар Монголия народнай өрөспүүбүлүкэтигэр (Чолбойсан, Улан-Батор к.) киирэн сулууспалаабытым, 7 төгүл мэтээлинэн наҕараадаламмытым Икки сыл устата комсомольскай тэрилтэ сэкирэтээринэн үлэлээбитим, взвод командирын көмөлөһөөччүтэ этим, кэлин наар Чита куоракка сулууспалаабытым. Алта сыл сулууспалаан баран 1951 с. дойдубар кэлбитим».
Армияттан кэлбит көхтөөх уолу «Буденнай» холкуос комсомольскай ячейкатын сэкирэтээринэн биир санаанан талаллар уонна кулууп сэбиэдиссэйинэн аныыллар. Кэлин Кирсан Петрович Гаганова бачыымынан сүөһү көрүүтүгэр тылланан үлэлии тахсар. «Бардыалааҕынан», «Парниковынан» элбэх сыл сүөһү үлэтигэр таһаарыылаахтык үлэлиир. Сэрии уонна үлэ бэтэрээнэ Кирсан Петрович 1960-с, 1970-с сылларга Үөдэй нэһилиэгин партийнай комитетын сэкирэтээринэн, табаарыстыы суут, лавочнай комиссия солбуллубат бэрэссэдээтэлинэн өр кэмҥэ үлэлиир.