РУБРИКАТОР
Мин эһэм туһунан кэпсиибин
Мин эһэм Винокуров Иван Семенович 1925 сыллаахха Салбаҥ нэһилиэгэр төрөөбүтэ. Үөрэҕэ 4 кылаас. Сэрии иннинэ Намнааҕы промотделга рабочайынан үлэлээбитэ. 1943 сыллаахха атырдьах ыйын 29 күнүгэр хара дьайдаах фашистартан норуотун, Ийэ дойдутун көҥүлүн көмүскүү, Улуу Кыайыыны уһанса, Нам оройуонун ыраах Таастааҕыттан сэриигэ аттаммыта. Эһэм бэргэн ытааччылар кирбиилэригэр сылдьыбыт. Кини барыаҕыттан эргиллиэр диэри пехотаҕа стрелок-саллаат быһыытынан I Белорусскай фронт арҕааҥҥы 67, 202, 492, 155 уонна 217 стрелковай полкаларыгар сылдьыбыта. Ол усталаах-туораларыгар үс төгүл: 1944 сыллаахха муус устар 10 күнүгэр төбөҕө, Берлин таһыгар ыараханнык илиитигэр уонна 1945 сыллаахха муус устар 19 күнүгэр атахха бааһырталаабыта. Эһэм Уйбаан Днепр, Висла, Одер өрүстэри уот будулҕан быыһыгар туораталаабыт. Кини элбэх бойобуой наҕараадалардаах: “За Победу над Германией”, “За взятие Берлина”, “За Отвагу”, “За доблестный труд в ВОВ 1941-1945 гг.” медаллар, Отечественной войны II степени орден. Кини фашистар алдьархайдаах, амырыын арҕахтарыгар тиийэ, кытаанах кыргыһыылары ааһыталаабыт. 217-с стрелковай полк 1945 с. ыам ыйын 1 күнүгэр өстөөх сүрүн күүстэрин үлтүрүппүттэрин ааһан, Рейхстаг үрдүгэр Кыайыы былааҕын аспыттарыгар эһэм кыттыыны ылсыбыт. Үрдүкү командованиеттан Жуков, Телегин, Сталин илии баттааһыннаах Махтал суруктарынан бэлиэтэммитэ. Эһэм бииргэ төрөөбүт икки убайдааҕа: Егор Семенович уонна Николай Семенович Винокуровтар. Кинилэр иккиэн сэрии хонуутугар геройдуу охтубуттара. Сэрии кэнниттэн эһэм Уйбаан колхозка, Таастаах нэһилиэгэр рабочайынан үлэлээбитэ. Онтон кэнники “Нам” совхоһун Таастаах учаастагар сайын — окко, кыһын — сүөһү көрүүтүгэр уонна сылгы аһатыытыгар үлэлээбитэ. Үлэлиир кэмнэригэр элбэхтэ “Нам” совхоз чемпионунан буолбута. “Производство бастыҥа” удостоверениенан наҕараадаламмыта. 1968 с. совхоз Бочуотун кинигэтигэр киирбитэ. Ленин 100 сылыгар аналлаах юбилейнай медаллаах. Сельсовет 1985 с. 4/7 №-дээх быһаарыытынан I Хомустаах нэһилиэгин бочуоттаах гражданина. “Революционнай бойобуой уонна Үлэ албан аат” кулуубун чилиэнэ этэ. Элбэх төгүл грамоталарынан, дипломнарынан, махтал суруктарынан бэлиэтэммитэ.
С.М.Кривошапкина