РУБРИКАТОР
«КЫҺЫЛ СУЛУС» КАВАЛЕРА
Сэбиэскэй сирбитигэр сэрэтиитэ суох сэриинэн саба түспүт фашистскай халабырдьыттартан син эмиэ бастыҥ уолаттарбыт курдук Ийэ дойдуларын көмүскүү маҥнайгы хомуурга барбыттар ортолоругар Винокуров Афанасий Саввич арҕаа фроҥҥа сылдьан, арай биирдэ «тыл» ыла икки нуучча саллаатынаан үһүө буолан барбыттар. Ол икки киһитэ автоматтаахтар эбит. Кини буоллаҕына, ыстыыктаах бойобуой бинтиэпкэлээх эбит. Түүн хараҥаҕа хайа тэллэҕэр лааҥкы мас кэтэҕэр тиийбиттэригэр арай сип-синньигэс сырдык уот дьырбыыланан көстөрө үһү. Онуоха, били икки киһитэ Афанасийы дьэ эн киир диэн баран мас кэннигэр сөрүөстэн хаалбыттар.
Хонооһой тыаһа суох сыбдыйан тиийэн көрбүтэ землянка аана бэрт кыратык аппайан турарынан сырдык тыгар эбит. Биптиэпкэтин ыстыыгынан олуйан аһа баттаат, «Бэриниҥ!» диэбитинэн көрбүтэ соҕотох немец офицера бириэйдэнэ турар эбит. Киһитин конвойдаан илдьэ тахсыбытыгар дьоно дьэ сырсан кэлбиттэр уонна чаастарыгар тиийээт, Хонооһойу: «Эн манна хаал, биһиги билиэннэйи туттарыахпыт» - диэбиттэр. Афанасий дэлби чиччигиниэр диэри кэтэспитин кэннэ, кэмниэ-кэнэҕэс рядовой Винокуров киир диэбиттэр. Киирбитигэр били тутан аҕалбыт офицердара эргиллэн көрөөт: «Бу киһи миигин землянка иһиттэн тутан таһаарбыта», - диэбит. Ол онон ааспыт. Аҕыйах хоноот, Хонооһойго «Кыһыл Сулус» ордены түөһүгэр иилэн кэбиспиттэриттэн күүппэтэх өттүттэн буолан соһуйбута да, үөрбүтэ да эбитэ үһү.
Афанасий Саввич туһунан «Мэҥэ Таас» кинигэттэн сиһилии билсибитим: «Винокуров Афанасий Саввич (1918-1982) призван в 1941 г. Демобилизован в 1946 г., награжден орденом «Красной Звезды», «Слава III степени», медаль «За боевые заслуги», «За победу над Германией» диэннэр эбит.
Дьэ ити курдук биһиги сахабыт ньургун уолаттара куттаҕаһа суох хорсуннук сэриилэһэн кыайыыны аҕалсыбыттарын биир туоһута ити Афанасий Саввич мүлчүргэннээх сырыытыттан көстөр.
Николай КОКОРЕВ