РУБРИКАТОР
Ушницкай Платон Дмитриевич
1922 сыллаахха Нам улууһун Бөтүҥ нэһилиэгэр төрөөбүтэ.
1942 сыллаахха бэс ыйын 18 күнүгэр Орджоникидзевскай оройуон Хачыкаатыгар суол оҥоһуутугар үлэлии сырыттаҕына, сэриигэ ыҥырыы сурук туппут. Сталинградскай фроҥҥа (Арҕааҥҥы фронт) - 1942-1943 сыллаахха 5-с танковай гвардейскай-механизированнай корпус састаабыгар киирэн отдельнай армияҕа 2-с биригээдэҕэ автоматчигынан сылдьыбыт. Званиета - рядовой.
Платон Дмитриевич Сталинградскай фронт кыргыһыытыгар эрэ буолбакка, Ростов, Харьков, Белгород, Полтавскай тимир суолугар, Курскайдааҕы Тоҕой кыргыһыыларыгар эмиэ сэриилэспитэ.
1943 сыл атырдьах ыйыгар Харьков куорат анныгар төбөтүгэр улахан бааһырыыны ылар. Госпитальга сытан өр эмтэнэн, үтүөрбүтүн кэннэ, байыаннай эбээһинэһиттэн устан дойдутугар ыыталлар.
1944 сыллаахха,
олунньуга элбэх өлүүлээх-сүтүүлээх сэрииттэн этэҥҥэ
тыыннаах дьиэтигэр эргиллэн кэлэн, 1945 сыллаахха хотуттан кэлэр түүлээҕи
таһыыга үлэлиир.
1958 сыллаахха осеменатордар курстарыгар үөрэнэр уонна 1965 сылга дылы осеменаторынан үлэлиир.
1965-1976 сылларга бостуугунан үлэлии сылдьан, бочуоттаах сынньалаҥҥа тахсар.
Наҕараадалара: Аҕа дойду сэриитин I степеннээх ордена. Мэтээллэр: «Бойобуой үтүөлэрин иһин», «Сталинград оборонатын иһин», «Германияны кыайыы иһин».
Платон Дмитриевич Ушницкай төрөппүттэригэр суруга
Күндү ытыктабыллаах дьоннорум!
Миигиттэн красноармейскай төлөннеөх эҕэрдэтэ тутуҥ! Мин биһиги социалистическай Ийэ дойдубут көмүскэлигэр киһи аймах өстөөҕүн утары охсуһуу фронугар ахсынньы 16 күнүттэн ыла сылдьабын.
Биһиги армиябыт бөҕө, өстөөххө модун охсуулары оҥорор. Биһиги подразделениебыт фашистскай сидьиҥнэри 11 нэһилиэнньэлээх пууннартан, 2 тимир суол станциятыттан үлтү охсон таһаарда. Кыһыл Армия модун күүстээх. Фашистскай талабырдьыттары үлтү урусхаллыы-урусхаллыы инники диэки кимэн киирэр.
Ытыктыыр дьоннорум! Мин доруобуйам үчүгэй. Мин соругум: бэйэм норуотум көҥүлүн уонна чиэһин иһин, партия иһин тиһэх хааппыла хааммар диэри өстөөҕү утары охсуһарга буолар. Оттон эһиги, Кыһыл Армияҕа элбэхтик уонна быыстала суох көмөлөһүҥ.
Колхозпутугар үчүгэйдик үлэлээҥ, фронтовик аҕатын уонна ийэтин быһыытынан киэн туттан туран үлэ бастыҥ холобурдарын көрдөрүҥ. Үчүгэйдик олоруҥ, доруобай буолуҥ, элбэхтик суруйуҥ!
Фронтовой эҕэрдэни кытта эһиги уолгут красноармеец П.Д. Ушницкай,
1943 сыл, бэс ыйын 24 күнэ