РУБРИКАТОР
МОДУТТАН БАСТАКЫ ХОМУУРГА БАРБЫТТАРА
Улуу Кыайыы 70 сылын көрсөрбүт аҕыйах ый хаалла. Сахабыт сирин олохтоохторо Кыайыыга бэйэлэрин кылааттарын киллэрбиттэрэ. Сорохтор Берлиннэ тиийэ кыргыспыттара, сэрии толоонугар сураҕа суох сүппүттэрэ. Сорохтор тыылга син биир фронна курдук сылдьыбыттара, үлэлээбиттэрэ, ону саастаах дьон бары бэркэ билэбит. Бу хаартыскаҕа көстөр эдэркээн уолаттар Модут нэһилиэгиттэн урукку «Большевик» колхозтан бастакынан бэбиэскэ тутан, уоттаах сэриигэ Ийэ дойдуларын көмүскүү бараары туран Намҥа түспүттэр.
Манна уҥаттан хаҥас Колесов Николай Кузьмич турар. Кини ханна-ханна тиийэн сэриилэспэтэҕэй?! «Большевик» колхоһун хочотугар от охсо сырыттаҕына, эмискэ аармыйаҕа барарга бэбиэскэ туттарбыттар. Аҕыс сүүсчэкэ киһи буолан Якутскайтан борокуотунан аттаммыттара.
Кыайыы күнүн Прага куоракка көрсүбүтэ. Албан аат 3 степеннээх уордьаннаах. Хорсунун иһин икки мэтээллээх, Германияны кыайыы, Берлини, Праганы ылыы иһин мэтээллэрдээх дойдутугар эргиллибитэ. Кини хаста да улаханнык бааһыран өлө сыспытын кэпсиирэ. Кэлэн араас үлэҕэ ситиһиилээхтик үлэлээбитэ. Кэлин Бөтүҥҥэ олохсуйбута. Элбэх оҕолордоох, сиэннэрдээх.
Иккис - Иван Дмитриевич Устинов. Уоттаах сэриигэ улаханнык бааһыран 1944 с. төннөн кэлэн, сэриигэ ылбыт бааһырыытыттан 1948 с. өлбүтэ.
Үһүс - Кирилл Семенович Евстафьев. Кини сэриигэ сураҕа суох 1942 с. өлбүтэ. Кирилл Семенович Чита куоракка тиийэн дьонугар суруйбут суруга билигин да аймаҕар Колесов Василий Кузьмичка баар. Ону «Мэн-э Таас» кинигэ 4-с томугар булан ааҕыаххытын сөп.
Төрдүс - Петр Никифорович Ядрихинскай. Эмиэ хаста да бааһыран 1944 с. дойдутугар эргиллибитэ. Кэлин үтүөрэн колхозка өр сылларга араас үлэҕэ үлэлээбитэ. Оҕолордоох, сиэннэрдээх. Кини кэнниттэн кэргэнэ Харитина Сивцева - Ядрихинская атаара барсан баран түһүспүт.
Кинилэри кытта бу хомуурга Никита Николаевич, Степан Игнатьевич Кутуков о.д.а. барбыттара. Билигин кинилэр оҕолоро, сиэннэрэ, кинилэр аҕалсыбыт эйэлээх олохторугар олороллор. Эһэлэрин ааттарын ааттаталлар, кинилэр олохторун салгыыллар. Улуу Кыайыы 70 сылын үлэҕэ, үөрэххэ үрдүк ситиһиилэрдээх көрсүөҕүҥ.
Д.И. Ядрихинская,
Модут нэһилиэгин ветераннарын сэбиэтин председателэ