РУБРИКАТОР
Тихонов Николай Данилович
Николай Данилович Тихонов 1912 сыллаахха Нам оройуонун Хатыҥ-Арыы нэһилиэгэр дьадаҥы бааһынай кэргэнигэр төрөөбүтэ. Кини үлэтэ 1931 сыллаахтан «Сэбэлээх» диэн сири холбоһон оҥорор табаарыстыба председателин дуоһунаһыттан саҕаламмыта. 1932 сыллаахха МТС иһинэн тракторист курсун бүтэрэн, механизатор буолар, үс сыл «Кыһыл Дэриэбинэ» колхозка трактористаабыта. Николай Данилович - 1937 сылтан «Уоһук» аатынан колхоз председателэ. 1941 сыл атырдьах ыйыгар Кыһыл Армия кэккэтигэр ыҥырыллыбыта. Немецкэй-фашисткай талабырдьыттары утары сэриигэ ыараханнык бааһыран, 1942 сыл ахсынньыга дойдутугар төннөн кэлбитэ. Стрелковай полк байыаһа Н.Д. Тихонов Албан аат III степеннээх орденынан, «Германияны кыайыы иһин» медалынан наҕаарадаламмыта. Сэрииттэн кэлэн баран, «Искра» колхоз үүт-табаарынай ферматын сэбиэдиссэйинэн, нэһилиэк советын исполкомун председателинэн, комплекснай биригээдэ биригэдьиирин солбуйааччынан үлэлээбитэ. Кини кэлин Карл Маркс аатынан колхоз оҕуруотун биригээдэтин салайбыта. Н.Д. Тихонов хайа да үлэҕэ туруорулуннар, кыһамньылаахтык уонна уһулуччу чиэһинэйдик үлэлииринэн колхозтаахтар ортолоругар улахан ытыктабылынан туһанара. Кини «1941-1945 сс. Аҕа дойдуну көмүскүүр Улуу сэриигэ килбиэннээх үлэтин иһин», «Килбиэннээх үлэтин иһин. В.И. Ленин төрөөбүтэ 100 сыла туолуутун бэлиэтээн» мэтээллэринэн наҕараадаламмыта.
Кэлин Карл Маркс аатынан колхоз Кыһыл Дэриэбинэтээҕи биригээдэтин партийнай тэрилтэтин секретарынан үлэлээбитэ. 1970 сыллаахха уһун ыарахан ыарыыттан өлбүтэ.