РУБРИКАТОР
НАМ УОЛАТТАРА СТАЛИНГРАД ИhИН КЫРГЫhЫЫГА
Сталинградскай кыргыһыыга кыттыбыт артиллерист Татаринов Семен Семенович 1973 сыл ыам ыйын 9 күнүгэр "Ленин суолугар" хаһыакка оҥорбут ахтыытыттан: "Миигин Москва куорат таһыгар Коломна диэн куоракка ыыппыттара. Онно тиийэн 40-с ударнай бригада 11-с артиллерийскай дивизиятыгар киирсэн Сталинградтааҕы кыргыһыыга барбыппыт. Биһиги дивизиябытыгар 12 "Катюша", 720 орудие баара. Кылаабынай командование резервэтэ диэн ааттанан өруүтүн көһө сылдьар этибит. Өстөөх саамай күүстээх оборонатын алдьатарга, эбэтэр өстөөх ханан кимэн киирэр атаакатын утары охсорго аналлаах этибит.
Биир түүн хараҥаҕа айаннаан, адьас маһа суох ыраас хонууга киирбиппит. Хаар анныттан стволларын хороппут орудиелар бугуллаах алааһы санаталлара. Сарсыарда 8 чаас буолуута: "Огонь!", - диэн хамаанда иһиллээтин кытта 12 "Катюша" өрө барылыы түстүлэр. Ону тэҥэ орудиелар эстэн ньирилэттилэр. Сотору-сотору орудиебытын тохтотон сойутабыт. Икки чаас холобурунан ытыах буолбут 120 снаряды бүтэрбиппит. Онтон: "Вперед!" - диэн хамаанда иһилиннэ. Балайда баран иһэн тохтоотубут уонна эмиэ ытыалаатыбыт. Онно көрдөххө, өстөөх оборонатын алдьатыыга үс квардатнай метр сиргэ биир снаряд түһэр гына ыттарбыттар. Өстөөх улахан дириҥ куоһаахтарга обороналанан олорбут эбит. Ону биһиги снарядтарбыт түөрэ булкуйбуттар Куоһаах иһэ, өрүс уута аҕалан аспыт сылбаҕын курдук, алдьаммыт массыыналарынан, киһи өлүгүнэн туолбут этэ".
С.С. Татаринов дойдутугар кэлэн баран Жданов, Сталин аатынан колхозтарга, кэнники пенсияҕа тахсыар дылы "Нам" совхозка зоотехниктаабыта.