РУБРИКАТОР
РЕХЛЯСОВ ДМИТРИЙ ПАВЛОВИЧ
(1924-1994)
Мин, 1943 сыл ыам ыйын 28 күнүгэр Якутскайдааҕы педучилище 2-с курсугар үөрэнэ сылдьан армияҕа ыҥырыллыбытым. Ол иннинэ сэрии ыарахаттарын, оччотооҕу студент хобдох олоҕун дьиҥнээхтик билбитим. Билиҥҥинэн 9-12 солкуобай стипендиянан олорорбут. Онно күннээҕи нуормабыт 400 грамм хара килиэб уонна күҥҥэ биирдэ күөстэнэрбит, эт сылбархай миинин эрэ үрдүнэн ыларын курдук. Онтон аныгыскы стипендияҕа дылы хас да хонук эстэн хааларбыт.
1942 с. сайын бэйэбит дойдубутугар тахсыбыппыт, онно өссө ыарахан балаһыанньа үөскээбит этэ. От үлэтигэр сарсыарда күн тахсыаҕыттан киириэр дылы үлэлиирбит.
Армияҕа да дьыала итинтэн ордуга суоҕа. Биһиги элбэх сахалар Монголия границатыгар Кяхта куорат аттыгар 20-с кондепоҕа түбэспиппит. Биһиги чааспыт фрону хааччыйар чааһынан ааттанара. Монголиятттан аттары үүрэн аҕалан, олору эмтээн, көрөн-харайан баран, үчүгэйдэрин, улахаттарын сэриилэһэр армияҕа атаарарбыт. Онтон мөлтөх кыра аттары норуот хаһаайыстыбатыгар ылаллара. Бу сылларга сулууспалааһын олус ыарахан этэ, ас-таҥас олус мөлтөх уонна тымныы буолан наһаа эрэйи көрбүппүт.
Кэлин 1944-1945 сс. дьыала арыый тупсубута, ас-таҥас бириэмэтигэр кэлэр буолбута. Саамай кылаабынайа Советскай Армия немецкай фашистары урусхаллаан иһэллэрэ санаабытын бөҕөргөппүтэ. Милитаристкай Японияны бэриннэрии кэнниттэн, биһигини соҕуруу Сахалиҥҥа, 1073-с строительнай батальон диэн ааттаан көһөрбүттэрэ, онно балтараа сыл кэриҥэ, үксүн береговой батареялар туруохтаах котлованнарын хаһыыга үлэлээбиппит. Дьэ, ити курдук сулууспалаан, мин дойдубар Дьокуускай куоракка, оруобуна түөрт сыл буолан баран, 1947 с. ыам ыйын 28 күнүгэр кэлбитим.
Ахтыыны суруйдум Рехлясов Д.П, сэрии ветерана