РУБРИКАТОР
РЕХЛЯСОВ АФАНАСИЙ ИННОКЕНТЬЕВИЧ-(ХОМУРУУС ХОНООҺОЙ)
Мин Рехлясова Ирина Афанасьевна, аҕам үтүө аатын үйэтитиэхпин баҕарабын. Аҕам 1898 сыллаахха Сэгэйээҥҥэ төрөөбүтэ. 1932 сыл «Чөмчөҕөй» колхоһу тэрийбиттэр. Председателинэн Рехлясов Василий Петрович (Моссокуун уола) этэ. 1937 с. холбоһон «Коминтерн» колхоз буолбуттара. Аҕам коммунист партия чилиэнэ, 1932-1942 сс. биригэдьииринэн үлэлээбитэ. 1935 сылга хайыһарга республикаҕа бастаабыта. 1937 сыллаахха ударниктар республикатааҕы слёттарыгар кыттыбыта.
Онтон 1942 сыл от ыйыгар сэриигэ барбыта. 1943 сыл атырдьах ыйыгар сураҕа суох сүттэ диэн биллэрии кэлбитэ. Кини иккитэ араанньа буолбута, бүтэһик суругар Арҕаа фроҥҥа бардым диэбит этэ. Мин аҕам фроҥҥа барарыгар 10 саастаах этим. Быраатым Афанасий Афанасьевич икки саастаах этэ. Мин бэйэм медицина, тыыл, үлэ ветеранабын, II группалаах инбэлииппин. Быраатым Афанасий Афанасьевич Российскай Федерация үтүөлээх тутааччыта, билигин пенсияҕа олорор.
1932 сыл «Чомчоҕой» колхозка аҕам 4 ынаҕы, 1 аты, 1 биэни «Кэрэ биэни» (маҕан уп-уһун сиэллээх, сүрдээх сымнаҕас) биэрбит. Кэлин «Хомуруус биэтэ» диэн ааттаан косилкаҕа илдьэ сылдьаллар этэ.
Ахтыыны суруйда Рехлясова И.А. ыам ыйа 2007 сыл