РУБРИКАТОР
ЗЕНИТЧИК
Кыыс Амма кэрэ кытылыгар уөскээбит, көнө күөх кырдалларыгар сүүрэн-көтөн эрчиллэн бэйэтин сөпкө кыанар, эдэригэр спордунан таптаан дьарыктаммыт Чупров Егор Семенович төрөөбүт сирэ Амма улууһун Бөтүҥ нэһилиэгэ буолар. Кини манна 1921 сыллаахха күн сирин көрбүтэ. Эдэр сааһыттан 1939 с.-1943 с. ыам ыйын ортотугар диэри «Кыһыл кэккэ» диэн колхуоска счетоводунан, председателинэн үлэлээбитэ. Аҕа дойду сэриитэ саҕаланыаҕыттан туруу үлэһит. Колхуостаах эр дьоннор үксүлэрэ армияҕа ыҥырыллан бараннар, хаалбыт колхуостаахтар үлэлииллэригэр олус ыарахан буолбута. Үлэһит илии тиийбэтэ колхуос председателигэр элбэх ыарахаттары үөскэтэр. Ол да буоллар Егор Семенович дьоннорун сөпкө аттаран туруортаан 1943 с. саас кыстыгы этэҥҥэ туоратан ыһыытын үлэтин этэҥҥэ болдьоҕор түмүктээбитэ. Онтон армияҕа ыҥырыллан Читинскэй уобаласка 278 стрелковай дивизия 885 полкатыгар 1944 с. кулун тутар ыйга диэри рядовой саллаатынан сулууспалаабыта.
Онтон 1944 с. кулун тутар ыйтан 1945 сыл сэтинньи ыйыгар диэри Забайкальскай стрелковай-минометнай училищены ситиһиилээхтик үөрэнэн бүтэрбитэ. Ол кэнниттэн 1946 сыл ыам ыйыгар диэри Читинскэй уобалас 162 отдельнай-зенитнэй дивизион штабыгар суруксутунан үлэлээбитэ. Онтон 1946 сыл бэс ыйыттан армияҕа сулууспатыттан босхолонон дойдутугар төрөөбүт Амматын кытылыгар этэҥҥэ эргиллэн кэлбитэ. Ол кэлэн баран дойдутугар 14 сыл устата колхуоска, райсовекка уонна райкомҥа араас үлэлэргэ таһаарыылаахтык үлэлээбитэ. Кэлин 1960 сыл саҥатыгар райсоюз председателэ Местников Г.И. ыҥырыытынан биһиги улуспобутугар үлэҕэ кэлбитэ.
Манна кэлэн кэргэнинээн Анисия Ивановналыын маҕаһыыҥҥа, ыскылааккҥа, кэлин пенсияҕа тахсарын саҕана инвентаризаторынан таһаарыылаахтык үлэлээбитэ. Кини улуспо систематыгар уопсайа 31 сыл устата үлэлээбитэ. Бу кэмнэригэр райпоҕа общественнай үлэлэргэ активнайдык кыттара. Ёгор Семенович айылҕаттан бэриһиннэрбит үчүгэй буочардаах үтүө суруксут, активнай позициялаах ирдэбиллээх уонна толоругас үлэһит быһыытынан, коллективка биллэн улаханнык убаастанар кырдьаҕаспыт буолар. Кини кыыһа Екатерина Егоровна төрөппүттэрин суолларын батыһан билигин улууска биир уопуттаах атыылааччы быһыытынан биллэр. Егор Семенович өр сыллаах үтүө үлэтин иһин потребительскай кооперация туйгуна знагынан бэлиэтэммитэ, маны таһынан үлэлээбит кэмигэр араас грамоталарынан, харчынан, бириэмийэлэринэн, фондаларынан бэлиэтэммитэ. Кини ыһылла-тоҕулла сытары, ыскылаат-маҕаһыын дьиэлэрин истэригэр бэрээдэгэ суох буолууну адьаһын сөбүлээбэт этэ. Өр кэмҥэ советскай былаас эрдэҕинэ улуспоҕа народнай хонтуруол головной группатын салайааччытынан үлэлээн элбэх итэҕэһи-быһаҕаһы хаһаайыстыбаннайа суох буолууну арыйталаан бэрт элбэх киһини эппиэтинэс араас көрүҥнэригэр таттарбыта. Онон кинини улуспоҕа үлэлээбит элбэх ахсааннаах дьон өйдүур-саныыр буолуохтаахтар. Кини үлэҕэ үтүө сыһыаннаһыы хаачыстыбатыгар бэрт элбэх ыччаты такайан үөрэппитэ. Аҕа дойду сэриитин кыттыылааҕа Егор Семенович Чупров улуспо үлэһиттэрин улаханнык ытыктыыр киһибит буолар. Ыстатыйам бүтэһигэр коллектив аатыттан ытык кырдаҕаспытын Аҕа дойду сэриитигэр Кыайыы 55 сыла туолар үбүлүөйүнэн эҕэрдэни тиэрдэбин уонна киниэхэ чэгиэн доруобуйаны, уһун дьоллоох, үтүө олоҕу баҕарабын.
Ф. ПРОТОПОПОВ, Ном улуспотун профкомун председателэ