РУБРИКАТОР
БЕРЛИНИ ШТУРМАЛААБЫТА
Протопопов Егор Григорьевич 1922 с. 1 Хомустаах нэһилиэгэр төрөөбүтэ. Кыра сааһыттан сытыы-хотуу буолан бурдук быһыытыгар, от охсуутугар үлэлээбитэ. 1940 с. Партизан 7 кылаастаах оскуолатын ситиһиилээхтик бүтэрбитэ. Оччолорго «Соттуу», «Хонордой» колхозтар холбонон «Киров» колхоз буолбуттара. 1942 с. Якутскай-Покровскай суолун оҥоруутугар үлэлии сылдьан ийэтин да көрсүбэккэ сэриигэ барбыта. Сталинграды көмүскүүр уоттаах хапсыһыыга түбэспитэ уонна ыараханнык бааһырбыта. Кини ол туһунан бу курдук ахтан аһарбыта: «Сэп-сэбиргэл тиийбэт буолан саата суох киирбитим, ити киинэҕэ көстөр мотуруостар курдук пулемет лентатынан эрийэн кэбистилэр, винтовканы аттыбар сүүрэн иһэр байыас оҕуннаҕына ылыахтааҕым. Эмискэ туохха эрэ сүр күүскэ кэтиллэ түһэргэ дылы гынным да, тиэрэ таһылла түстүм. Буулдьа түөскэ түһэн баран көхсүбүнэн дьоло көтөн тахсыбыт этэ. Онон бастакы араанньабын өстөөҕү харахтаабакка да сылдьан ылбытым». Украинаны босхолоспута, Польша, Венгрия сиригэр сэриилэспитэ.
Илиҥҥи Пруссия столицата Кенигсберы ылсыбыта. Берлини штурмаласпыта, ити былаһын тухары инники кирбиигэ пулеметчик, снайпер уонна разведчик быһыытынан өлөр-тиллэр икки ардынан хабыр хапсыһыыларга сылдьыбыта. Сэрии бүтэһигин диэки аатырбыт Рокоссовскай командующайдаах 3-с Белорусскай фронт 132-с гвардейскай дивизия састаабыгар разведка взводугар сылдьан Берлин иһин операция кэмигэр Брандербург куоракка тиһэх төгүлүн сүнньүгэ бааһырбыта. 1946 с. этэннэ дойдутугар эргиллибитэ.
1944 с. Шолбаки дэриэбинэни раздведкалаан саба түһэн ылыыга «Кыһыл сулус» орденынан наҕараадаламмыта. Кулун тутар саҥатыгар разведчиктарга «тылы» ылан аҕаларга бирикээс биэрбиттэр, үс бойобуой доҕотторун сүтэрэн, өстөөх 2 саллаатын уонна унтер-офицеры аҕалбыттара. Ол иһин кулун тутар 25 күнүнээҕи бирикээһинэн «Аҕа дойду Улуу сэриитин» 2-с степеннээх орденынан наҕараадаламмыта. Биһиги сэриилэрбит Одер өрүскэ тиийбиттэрэ, өрүс кэтитэ 300 метр. Берлин күлүүһүн тыла Одер өрүскэ сытар дииллэрэ. Ууну аннынан кабелы тардарга 14 чулуу разведчигы талбыттара, ол иһигэр саха ньургун уола Егор баара. Бу операция иһин «Албан аат» 3-с степеннээх орденынан наҕараадаламмыта. 1944 с. олунньу 2 күнүн түүнүгэр Шестоки дэриэбинэттэн табаарыстарын кытта сыаналаах докумуоннары уонна 1 офицеры тараччы тутан аҕалбыта, бу иһин «Хорсунун иһин» медалынан наҕараадаламмыта.
Егор Григорьевич 1972 с, баара-суоҕа 50 сааһыгар, сэриигэ ылбыт баастара дьайаннар күөгэйэр күнүгэр сылдьан биһиги кэккэбититтэн туораабыта.