РУБРИКАТОР
АРҔАА УОННА ИЛИН ФРОННАРГА
Никольскайга олохтоох бааһынай, кэнники колхозтаах Федор Яковлевич Полищенко Семен, Федор, Афанасий, Филипп уонна Илья диэн уолаттардааҕа. Кинилэр бары Каландарашвили, кэлин Киров аатынан колхоз турук үлэһиттэрэ буолбуттара.
Уолаттартан Филипп 1935 сылтан 1940 сылга диэри Кэбээйигэ үлэлээн баран, уһун уоппускаҕа дойдутугар күүлэйдии, сынньана кэлбитэ. Ити сырыттаҕына фашистскай Германия биһиги Ийэ дойдубутугар сэриинэн саба түспүтэ. Филипп бырааттарынаан Федордыын уонна Афанасийдыын Кыһыл Армия кэккэтигэр ыҥырыллан барбыта.
Федордаах Афанасий дойдуларыгар эргиллибэтэхтэрэ, Ийэ дойдуну фашистартан көмүскүүр кыргыһыы хонууларыгар геройдуу охтубуттара.
Сержант Филипп Полищенко сулууспалыыр чааһа генерал полковник Людников командалыыр 39-с армиятын састаабыгар киирэрэ, кэлин 2-с Украинскай фронт састаабыгар холбоспута. 39-с армия Духовщина, Витебскэй, Кенингсберг таһыгар немецкэй-фашистскай армияны үлтүрүтүспүтэ. Кэлин Молдавияҕа тиийэн Бендери, Каушаны, Чимишля анныларыгар өстөөх улаханнык бөҕөргөтүммүт сирдэрин ылар иһин кыргыһыылары ыыппыта.
Фашизмы утары кыргыһыыга сержант Полищенко бойобуой суола Прагаҕа кыайыынан түмүктэммитэ. Фашистар капитуляциялаабыттара, арҕаа Европаҕа сэрии уота умуллубута. Оттон илин сэрии көрдүгэнэ баара. Империалистическай Япония биһиги кыраныыссабытыгар Маньчжурияҕа сүрдээх күүстээх Квантунскай армияны тутан турара. Ити үлтүрүтүлүннэҕинэ эрэ аан дойдуга сэрии куттала суох буолуохтааҕа.
Верховнай Кылаабынай командование бирикээһинэн Людников генерал 39-с армията Прагаттан олоччу көһөн Монголия Народнай Республикатыгар Маньчжурия кыраныыссатыгар кэлэн тохтообута. Бэйэтин союзниктарын АХШ уонна Англия иннилэригэр ылыммыт эбэһээтэлистибэтин толорон советскай правительство 1945 с. атырдьах ыйын 8 күнүнээҕи сайабылыанньатыгар империалистическай Японияны кытта сэриилэһэрин биллэрбитэ.
Атырдьах ыйын 9 күнуттэн биһиги армиябыт сэриини саҕалаабытынан барбыта. Филипп Федорович сулууспалыыр 39-с армията Маньчжурияҕа киирэн японскай сэриилэри кытта кыырыктаах хапсыһыыны саҕалаабыта.
Маньчжурия уута суох хонуу куйаардарын, Хинган аатырбыт очумаас таас хайаларын туораабыттара. Маньчжурияны хаба ортотунан хайа солоон Порт-Артурга тиийбиттэрэ. Армия итиннэ сэриини кыайыылаахтык түмүктээбитэ.
Филипп Полищенко Порт-Артурга өссө биир сыл сулууспалаабыта. 1946 сыл алтынньытыгар демобилизацияланан төрөөбүт Намыгар төннөн кэлбитэ. Кэлэригэр киниэхэ армия бойобуой суолун ахтан, онно сержант Полищенко үтүөтэ-өҥөтө баарын ааҕан махтал сурук туттарбыттара.
Бу суругу илии баттаабыттар 39-с армия командующайа, Советскай Союз Геройа гвардия генерал-полковнига Людников, армия Байыаннай Советын чилиэнэ, Советскай Союз Геройа генерал-лейтенант Бойко, армия политотделын начальнига генерал-майор Петров, армия штабын начальнига генерал-майор Силиновскай.
Филипп Федорович Советскай Армия Верховнай Кылаабынай командующайын 11 махтал суругун бэрт кичэллээхтик уура сылдьар. Кини элбэх бойобуой медаллар кавалердара.
В. Петров