РУБРИКАТОР
ДЬИҤНЭЭХ КОММУНИСТ
Биһиги аҕабыт, Петров Степан Андреевич, сэрииттэн кэлэн баран төрөөбүт нэһилиэгэр колхозка биригэдьииринэн, бырабылыанньа солбуйааччы председателинэн, партийнай тэрилтэ секретарынан, Көбөкөн нэһилиэгин Совет исполкомун председателинэн өр сылларга үлэлээбитэ. Степан Андреевич туһунан оччотооҕу «Коммунизм» колхоз правлениетын председателэ Михаил Егорович Пестерев бу курдук ахтар: «Үлэлээбит бары сылларбар солбуйааччым Степан Андреевич Петров барыга барытыгар олус дьоҕурдаах, холку, ханнык да боппуруоһу олус дириҥник анализтаан, сыаналаан баран быһаарыы ылынааччы, чахчы улахан салайар талааннаах, сүрдээх принципиальнай, партийнай суобастаах, дьиҥнээх коммунист этэ, улахан авторитетынан туһанара. Кини тылын, сүбэтин олус истэллэрэ, дэлэҕэ даҕаны биир түбэлтэҕэ уон икки киһиттэн уон биирин партия кэккэтигэр киллэриэ дуо».
Михаил Егорович Пестерев, Степан Андреевич Петров, Иннокентий Николаевич Иванов, Константин Гаврильевич Лукинов, Петр Афанасьевич Дьяконов буолан сүбэлэһэн баран икки этээстээх мас оскуола дьиэтин тутуутун кэпсэтиитин саҕалыахха диэн быһаарыы ылыммыттар. Сааһын, күһүнүн Малдьаҕар - Лөкүөрүмэ эбэлэр икки ардыларынааҕы систэргэ субботнигынан оскуола маһын кэрпиттэрэ. Оччолорго үлэ үгүс салааларыгар субботниктары балачча тэрээһиннээхтик, хойуутук ыытар этилэр. Онон оройуоҥҥа бастакынан биһиги нэһилиэккэ икки этээстээх мас оскуола дьиэтэ тутуллубут. Кэлин ити оскуола проектарынан Модукка, Түбэҕэ оскуолалар тутуллубуттара.
Оскуола тутуутуттан сиэттэрэн тутууну ыытар, кэҥэтэр, сайыннарар кыахтар баалларыгар эрэл санаалар колхозтаахтар өйдөрүгэр дириҥник иҥмиттэрэ. Производственнай объектары - хотоннору, гаражтары, станция, колхозтаахтар олорор дьиэлэрин тутуу биллэрдик-көстөрдүк кэҥээбитэ, күүһүрбүтэ.
Оттуур ходуһа сирин оҥорууга, мэччирэҥи тупсарыыга, кэҥэтиигэ балачча үлэлэр ыытыллыбыттар.
Дьэ ити курдук кини сэрии уотун ортотунан ааһан, үлэ үөһүгэр сылдьан сирдээҕи дьолу билбитэ.
Степан Андреевич Көбөкөн дьиҥнээх патриота этэ - нэһилиэгин историятын суруйбута, сэриигэ баран өлбүт буойуннары бүтүннүүлэрин дьонноруттан хаартыскаларын көрдөөн булан ону хат түһэрэн, улаатыннаран барыларын мөссүөннэрин үйэтиппитэ. Дьон-сэргэ саҥа дьиэ тутуннаҕына ис-сүрэҕиттэн үөрэрэ, дьоллоноро. Ким кыһалҕалаах бары кэлэн сүбэ-ама көрдүүллэрэ. Норуот ырыаһыта Бэдьээлэ анаан-минээн Украина суруйааччыларыгар сурук суруйтара кэлэрэ. Аҕабыт хаһан да кими да куһаҕаннык саҥарбытын, мөхпүтүн-эппитин өйдөөбөппүт. Бэйэтэ олус сэмэй киһи этэ. Оччолорго туох баар табаар барыта нуорма-талон кэмигэр, ийэбит биирдэ эмит маҕаһыыҥҥа баран быһа тугу эмит ылыа эбиккин диэтэҕинэ: «Мин маҕаһыыҥҥа быһа атыылаһаары сэриилэспэтэҕим», - диэн кэбиһэрэ. Дэлэҕэ да сэбиэттээн олордоҕуна бэйэбит оттор маһа суох буолан, таһынааҕы ыалбытыттан салаасканан мас аҕалыахпыт дуо! Оннук сэмэй киһи этэ, биһиги аҕабыт.
Саамай абааһы көрөр хаачыстыбата - ымсыы этэ, биһигини «хаһан да дьоҥҥо ымсыырбат буолуҥ, барытын бэйэҕит үлэлээн булун» диирэ иҥэн хаалбыт. Хаһан да үҥсэргээбэт, ыалдьабын-хайыыбын диэбэт этэ. Дэлэҕэ да, 1972 сыллаахха сүрдээх улаханнык инсультаан баран, санаатын күүһүнэн өрүттэн, өссө уонча сыл пенсияҕа тахсыар дылы нэһилиэги салайбыта.
Дьэ итинник дьиҥнээх коммунист киһи этэ биһиги аҕабыт Петров Степан Андреевич.
Ахтыыны суруйда кыыһа Сидорова О. С