РУБРИКАТОР
ПЕТРОВ СЕМЕН АНДРЕЕВИЧ (КЫДЫГЫР)
(1903-1943 сс.)
Петров Семен Андреевич Көбөкөҥҥө төрөөбүт, элбэх оҕолоох Петровтар дьиэ кэргэннэригэр.
Семен Андреевич төрөппүттэрэ Андрей Григорьевич, Варвара Степановна бэйэлэрин кыанар орто ыаллар этэ. Аччыгый Булгунньахтаах диэн сиргэ сайылыыллара. «Тыһаҕас сиэбиккэ» оттууллара, Бөлөҕөс арыытыгар кыстыыллара. Бииргэ төрөөбүттэрэ алта этилэр: Алексей, Семен, Федор, соҕотох кыыстара Матрена, Григорий уонна Степан. Аҕа дойду сэриитэ саҕаламмытыгар Семен Андреевич быраатынаан Григорий Андреевичтыын, 1941 сыл бэс ыйын 24 күнүгэр сэриигэ барбыттара. Бу кэмҥэ Семен Андреевич кэргэннээх, уол оҕолоох этэ. Кэргэнэ Огдооччуйа диэн орто уҥуохтаах, бэйэтигэр сөп эттээх-сииннээх, маҥан төгүрүк сирэйдээх, кугас баттахтаах, халыҥ уостаах, бааһынай көрүҥнээх дьахтар этэ. Үчүгэй, сымнаҕас майгытынан биллэрэ, өрүү күлүүлээх-оонньуулаах сылдьара.
Кэргэнэ Сэмэн сэриигэ барбытын кэннэ, колхозка эр киһи курдук от-мас тиэйиитигэр туруу үлэһитинэн биллибитэ. Сэмэн бэйэтэ эмиэ сымнаҕас, судургу, холку майгылааҕа, аҕыйах саҥалааҕа, куруук күлэн ыдьырыта сылдьарын иһин «Кыдыгыр Сэмэн» диэн хос ааттаабыттара. «Коминтерн» колхозка от-мас тиэйиитигэр, сүөһү көрүүтүгэр, от үлэтигэр тэҥнээҕэ суоҕа, үлэһит бөҕө этэ. Сэриигэ барыан иннинэ төрөөбүт колхоһугар суотчутунан үлэлээбитэ.
Сэриигэ ыҥырыллан Арҕааҥҥы фронт састаабыгар түбэһэн, 1943 сыллаахха Белоруссия туһаайыытыгар хааннаах кыргыһыыга өлбүтэ.
Ахтыыны суруйда сиэнэ Петров Семен Степанович
.