РУБРИКАТОР
АҔАМ — БАЙЫАННАЙ БИЭЛСЭР ФЕОДОСИЙ ПЕТРОВ
Аҕам Петров Феодосий Васильевич 1914 сыллаахха балаҕан ыйын 14 күнүгэр Нам улууһун Партизан нэһилиэгэр төрөөбүтэ. Быйыл оруобуна төрөөбүтэ 100 сылынан уонна Улуу Кыайыы 70 сыллаах үбүлүөйүнэн сибээстээн, кини сырдык аатын ааттаан, бэлиэтииргэ сананным.
Аҕам барахсан бу Орто туруу бараан дойдуга баара-суоҕа 42 эрэ сыл олорон ааһаахтаабыт. 26 саастааҕар Чурапчыга доруобуйа харыстабылын отделын сэбиэдиссэйинэн үлэлии сылдьан, 1941 сыллаахха Аҕа дойду Улуу сэриитигэр тылланан туран барбыта.
Кэргэним, биллиилээх суруналыыс, документалист-суруйааччы Дмитрий Николаевич Гаврильев бу курдук бэлиэтээн суруйбута: "Байыаннай фельдшер, лейтенант Феодосий Васильевич Петров хорсун суола Германскай фашизм арҕаҕар, Берлин куоракка, кыайыы өрөгөйүнэн түмүктэммитэ. Лейтенант Петров 382 стрелковай дивизия 1265-с стрелковай полкатыгар туспа санитарнай-медицинскэй батальоҥҥа сулууспалаабыт. Төһөлөөх бааһырбыт буойуннары эмтээн, тыын уган, күн сырдыгын көрдөрбүтэ буолуой. Феодосий Васильевич сайдам-сайаҕас майгылааҕа, үрдүк ис култууралааҕа. Ол да иһин буолуо, сэрии кэнниттэн Берлин куорат гарнизонугар икки сыл сулууспалаабыта. Кини суостаах сэрии хонуутугар түөрт төгүл бааһырбыта. Хата, эмтэнэн, этэҥҥэ оһон, бааһа-үүтэ чэрдийэн испитэ. Буойун Ф.В.Петров "Хорсунун иһин", "Варшаваны босхолооһун", "Берлини ылыы иһин" бойобуой мэтээллэринэн, Кыһыл Сулус уордьанынан наҕараадаламмыта.
Аҕабытыттан биһиги төрдүөбүт. Уолаттара Василий Феодосьевич, Александр Феодосьевич, кыргыттара Любовь Феодосьевна уонна мин, Анна Феодосьевна, бары үөрэҕи, үлэни тутуһан, ыал буолан, оҕо-уруу тэнитэн сааһыран улахан, дьоллоох олоҕу олорон кэллибит. Төрөөбүт Ийэ дойдутун халабырдьыт өстөөхтөртөн хаанын тоҕон туран хорсуннук көмүскээбит буойун, байыаннай медик, лейтенант Петров Феодосий Васильевич итии хаана кини оҕолорун, сиэннэрин, хос сиэннэрин тымырдарынан тыргыллар. Кийииттэрин, сиэннэрин ортолоругар эһэлэрин туйаҕын хатаран, өрөспүүбүлүкэҕэ биллэр быраастар бааллар диэн киэн тутта этэбин. Инникитин да кини аныгы көлүөнэ ыччаттара үүнэ-сайда туруохтара, саллаат эһэлэрин курдук Ийэ дойдуларын төлөннөөх патриоттара буолуохтара. Олох салҕанар, ситим быстыбат.
Анна Гаврильева (Петрова),
сэрии кыттыылааҕын оҕото, үлэ бэтэрээнэ