РУБРИКАТОР
АЛБАН ААТ ОРДЕНЫН КАВАЛЕРА
1941 сыл атырдьах ыйын 5 күнүгэр төреөбүт Ийэ сир дьылҕата быһаарыллар ыарахан, кыырыктаах сэрии үгэннээн бара турдаҕына Семен Павлов, Якутскайдааҕы тыа хаһаайыстыбатын техникумун иккис курсун студена, Советскай Армия кэккэтигэр ыҥырыллыбыта. Кини Омскай, Саратов куораттарга сыл кэриҥэ бэлэмнэниини барбыта.
1942 сыл алтынньы саҥатыгар Семен Павлов Сталинград куоратын кыырыктаах кыргыһыыларыгар сүрэхтэммитэ. Бу куорат оччолорго дойду дьылҕатын быһаарыыга улахан суолталааҕа. Ол иһин хас биирдии саллаат, командир уллуҥах сир иһин өлөрүн кэрэйбэккэ, хабырдык хапсыһара, героизм муҥурдаммат холобурдарын көрдөрөрө. Ити кэнниттэн сержант Павлов Доннааҕы-Калач туһаайыытыгар икки ыйтан ордук кэмҥэ хабараан кыргыһыыларга алта төгүл атаакаҕа киирсэн, хорсуннук сэриилэспитэ.
Н-скай полк. 1942 сыл ахсынньы 2 күнэ. Бу күн Семен Петрович өстөөҕүн утары сэттис төгүлүн атаакаҕа киирсибитэ. Онно кини аттыгар миномет снаряда түһэн тоҕу тэппитэ...
Госпиталь. Биирдэ өйдөнөн кэлбитэ уҥа атаҕа үлтүрүтүллүбүт этэ. Атаҕын үөһэ өттүнэн быспыттара..
Албан Аат үһүс степеннээх орденын кавалера Семен Петрович Павлов аҕыс ый устата эмтэнэн баран, 1943 сыл балаҕан ыйыгар төрөөбүт сиригэр - Бөтүҥҥэ эргиллэн кэлбитэ.
Фронтовик-саллаат сэрииттэн кэлээт тэһийэн олорботоҕо. Икки ыйы кыайбат кэмҥэ сынньанан баран, оччотооҕу Молотов аатынан колхозка старшай суоччутунан үлэҕэ киирбитэ. Ити кэмтэн ылата бөдөҥсүйбүт Карл Маркс аатынан колхозка кылаабынай бухгалтерынан, онтон М. Аммосов аатынан совхоз Хатыҥ Арыытааҕы отделениетын старшай бухгалтерынан үлэлии сылдьар. Кини бу үлэтигэр 29 сыл сыратын биэрэн, ситиһиилээхтик үлэлиир.
Хас да төгүл үлэһиттэр депутаттарын нэһилиэктээҕи Советын депутатынан быыбардаммыта. 1947 сыллаахха коммунистическай партия кэккэтигэр киирбитэ. Коммунистар үрдүк итэҕэллэрин ылан партбюро чилиэнинэн кэккэ сыллар усталарыгар талыллан үлэлиир.
Коммунист-фронтовик Семен Петрович Павлов амарах сүрэхтээх аҕа, эйэҕэс майгылаах кэргэн баһылыга. Кэргэнинээн, Евдокия Николаевналыын, төрөппүт оҕолорун үөрэх киэҥ аартыгар үктэннэриигэ үгүс сыраларын биэрэллэр. Кинилэр үтүө кыһамньыларынан оҕолор бары олох киэн аартыгын тэлэйэ астылар. Улахан кыыстара Мария Ростовтааҕы экономическай институту ситиһиилээхтик бүтэрэн, быйыл М. Аммосов аатынан совхозка старшай экономиһынан үлэлии кэллэ. Уоллара Петр билигин Новосибирскайдааҕы тутуу институтун маҥнайгы курсугар үөрэнэр, Нина онус кылааһы бүтэрэн баран совхозка сүөһү иитиитигэр үлэлиир, оттон кыра уоллара онус кылааһы бүтэрэн баран Якутскайдааҕы шофердар курстарыгар үөрэнэр.
М. Ядрихинкай