РУБРИКАТОР
НОГОВИЦЫН НИКОЛАЙ АНДРЕЕВИЧ
Мин аатырар Тараҕана сайылык ортотугар «Сылгы Бастаахха» төрөөбүтүм. Ийэм биэс саастаахпар ыалдьан өлбүтэ. Кинилэр колхозтаах этилэр. Мин сэрии бастакы сылларыгар алтыс кылааһы бүтэрэн баран сайынын окко звеноводтаабытым. Онно оҕонньоттор Егор Самсонович Потапов, Петр Сте-панович Павлуцкай салалталарынан сылдьыбытым. Биир сүрүн үлэһиппит Матрена Васильевна Гаврильева этэ. Кини биирдии гектар сири охсоро. Онтон сэттиһи бүтэрэн баран нэһилиэк Советын секретарынан, биир кэмҥэ налоговай агенынан үлэлээбитим. Ити үлэлэрим «1941-1945 сс. килбиэннээх үлэтин иһин» диэн мэтээлинэн сэрии бүппүтүн кэннэ наҕараадаламмытым. Үлэлии сылдьан Армияҕа ыҥырыллан, бастаан Мальта станцияҕа, онтон Боржаҕа тиийбиппит. Боржаҕа улахан расформировка буолбута, онно үгүстэр ханна нуучча барар сиригэр бара сатыыллара. Биһиги ханна ыыталларынан диэн санааттан турарбыт. Онтон биһигини быһа анньан Маньчжурияҕа ыыппыттара. Забайкальскай фронт алтыс Армиятын, Кыһыл Знамялаах 91 ротаҕа түбэспитим. Армия командирынан маршал Г. Малиновскай этэ. Бу рота немец сэриитигэр ситиһиилээхтик кыргыспыт этэ. Онон мин Японияны утары сэриигэ кыттыбытым, сэрииттэн ордубут бандьыыттары (тунгуштары) суох оҥорсубутум. Биһиги ротабытыгар 13 национальность баара, миигин борустуой саха уолун командирдарым олус таптыыллара, аһыналлара. Мин военнай походнай кухняҕа стрелей-поварынан, сэрии бүппүтүн кэннэ офицерскай кухняҕа повардаабытым.
ССРС Верховнай Советын Президиумун 1945 с. балаҕан ыйын 30 күнүнээҕи укааһынан «Японияны Кыайыы иһин» мэтээлинэн наҕараадаламмытым. Бу мэтээли 1946 сыл кулун тутар 18 күнүгэр Фушунь куоракка туттарбыттара. Ротабар бастыҥ толоругас саллаат быһыытынан сылдьыбытым, командование махталларын ыларым, военнай званием - ефрейтор этэ. Ротам командирын старшай лейтенант Лыткины, капитан Лыткины, капитан Карманниковы, старшиналар Атамановы, Альматовы, Ломахины олус убаастабыллаахтык саныыбын. Кинилэр үтүө сыһыаннарыгар махтанабын. Старшай лейтенант тов. Лыткин сэрии бүппүтүн кэннэ демобилизацияланан барарыгар долгутуулаах этиилэриттэн биһиги бары хараастыбыппыт. Кини эппитэ: «Ийэ дойдум наадыйар күнүгэр сарсын эһигини кытта баар буолуом» - диэн.
Сэрииттэн кэлэн баран биир сыл продавецтар курстарыгар, финансовай техникумҥа үөрэммитим, бүтэрэн баран биир сыл продавецтаабытым. Онтон 1948 с. Якутскайга медицинскэй училищеҕа үөрэнэ киирбитим уонна 1952 с. бүтэрбитим. Медицинскэй үлэбин 2-с Хомустаахтан саҕалаабытым. Комсомолтан ССКП чилиэнигэр киирбитим. Үчүгэй үлэм иһин Саха АССР Верховнай Советын Президиумун ыйааҕынан Почетнай грамотанан, В.И. Ленин төрөөбүтэ 100 сылын туолуутугар үчүгэй үлэм иһин мэтээлинэн, элбэх Минздрав, райком, райсовет, профсоюз грамоталарынан наҕараадаламмытым. Билигин мин түөспүн «Аҕа дойду сэриитин» 2 степэннээх ордена, 12 мэтээллэр киэргэтэллэр.
Хас да төгүл II Хомустаахха, Көбөкөн нэһилиэктэрин Советын депутаттарынан, 16 сыл сыахтааҕы партийнай тэрилтэ секретарынан, биир төгүл бөдөҥсүйбүт «Коммунизм» колхоз парткомун солбуйар секретарынан үлэлээбитим. Миигин ииппит, үөрэппит комсомолбар, коммунистическай партиябар муҥура суох махтанабын.
Ахтыыны окордум Н.А, Ноговицын, сэрии ветерана.
Улуу Кыайыы 45 сыллаах юбилейыгар. Ыам ыйын 3 к. 1990 с. Харыйалаах бөһ