РУБРИКАТОР
ОЛОҔО БИҺИЭХЭ САЛҔАНАР
Биһиги аҕабыт Максим Егорович Никитин 1907 сыллаахха Бөтүҥ нэһилиэгэр төрөөбүтэ. Аҕалара эрдэ өлөн, үс уол Роман, Максим уонна Иннокентий соҕотох ийэҕэ иитиллибиттэрэ.
Бөтүҥҥэ 1931 с. «Баакычча» диэн тыа хаһаайыстыбаннай артыал тэриллибит. Эдэр Максим Никитин бу колхозка чилиэнинэн киирбит, онтон 1934 с. кинини биригэдьииринэн анаабыттар, кэлин үүт-табаарынай ферматын сэбиэдиссэйинэн үлэлээбит. Урукку былааска, хараҥа үйэҕэ төрообүт буолан үөрэммэтэр даҕаны, олоҕу кытта тэҥҥэ хаамсан испит. Ол курдук, 1940-1942 сс. Көбөкөн нэһилиэгэр Сэбиэт исполкомугар председателлээбит. Бу кураан уонна сэрии саҕаламмыт ыарахан дьылларыгар нэһилиэк дьонун олоҕун-дьаһаҕын тэрийсиигэ, фроҥҥа көмөнү оҥорууга Максим Егорович элбэх сыратын биэрэн үлэлээбитэ диэн бэлиэтииллэр.
Аҕа дойду сэриитин саамай ыар кэмнэригэр 1942 с. фроҥҥа ыҥырыллан Арҕааҥы фронт 15-с мотострелковай биригээдэтигэр тиийэн Сталинград туһаайыытынан Орловскай, Курскай тоҕойунан хаан өстөөҕү утары кыргыспыт. 1943 с. саҥатыгар Харьков куорат туһаайыытынан улахан хаан тохтуулаах кыргыһыылартан биирдэстэригэр ыараханнык бааһырбыт. Инньэ гынан, госпитальга сытан эмтэнэн баран, төрөөбүт Бөтүҥэр төннөн кэлбит. 1944 сыл олунньутугар колхозтаахтар уопсай мунньахтарынан аҕабытын Максим Егоровиһы Молотов аатынан колхоз бырабылыанньатын председателинэн быыбардаабыттар. Кини бу дуоһунаһыгар 7 сыл эҥкилэ суох үлэлээбит. 1951 с. оройуоҥҥа колхозтар бөдөҥсүйүүлэрин кэнниттэн кини бырабылыанньа председателин солбуйааччынан уонна биригэдьииринэн 1963 с. диэри үлэлээбит. Партия дьыалатыгар үрдүк бэриниилээх, 1946 сылтан коммунист этэ. Үлэлээбит сылларыгар колхозтар олохторо-дьаһахтара бөҕөргүүрүн туһугар ураты бэриниилээҕин, үлэҕэ-хамнаска кытаанах ирдэбиллээҕин, дьаһалын толорторорун, дьону толуннарар майгылааҕын туһунан бэйэтин кэмигэр үлэлэспиттэр ахталлара. Пенсияҕа тахсарыгар Карл Маркс аатынан колхоз салалтата өр сылларга эҥкилэ суох үлэтин иһин махтанан туран миинэр атын бэлэхтээбиттэр уонна 100 солк. харчынан бириэмийэлээбиттэр. Кэлин 1967 с. киниэхэ Карл Маркс аатынан колхоз Бочуоттаах колхозтаах ытыктабыллаах аатын иҥэрбиттэрэ. Сэрии уонна үлэ ветерана «Бойобуой үтүөлэрин иһин» уонна да атын 4 мэтээллэринэн, Саха АССР Верховнай Советын Президиумун Бочуотунай грамотатынан наҕараадаламмыта.
Аҕабыт Максим Егорович 1935 с. ийэбитин Попова Анна Семеновнаны кэргэн ылан, 6 оҕону олох суолугар үктэннэрэн, үөрэхтээн, ыал оҥорбуттара. 53 сыл устата эйэ-дэмнээхтик бииргэ олорбуттара. Төрөппүттэрбит олохторо биһиэхэ холобур буолар, оҕолорбутугар, сиэннэрбитигэр салҕанар.
Надежда Максимовна ЕМЕЛЬЯНОВА (НИКИТИНА),
төрөппүт кыыһа, РФ үөрэҕириитин туйгуна, педагогическаи үлэ ветерана