РУБРИКАТОР
Неустроев Петр Андреевич
(1914-1976 сс.)
Наҕараадалара:
«1941-1945 сс. Аҕа дойду сэриитигэр Германия ны кыайыы иһин» мэтээл;
«1941-1945 сс. Аҕа дойду сэриитигэр килбиэннээх үлэтин иһин» мэтээл;
Юбилейнай мэтээллэр.
Мин, Неустроев Петр Андреевич, 1914 с. уруккута Бороҕон улууһун I Суотту нэһилиэгэр орто бааһынай дьиэ кэргэҥҥэ төрөөбүтүм. 1929 с. начальнай оскуоланы бүтэрбитим. 1930 с. холкуоска киирбитим.
1931-1932 сс. I Суотту нэһилиэгин Сэбиэтигэр суруксутунан, 1936 с. Саһылыкаан нэһилиэгэр «Кыым» холкуоска сэриигэ барыахпар диэри ферма сэбиэдиссэйинэн үлэлээбитим.
1941 с. атырдьах ыйыгар Чурапчы райвоенкоматынан ыҥырыллан армияҕа барбытым. Дальнай Востокка «Хады-Буллах» диэн тимир суол станциятыгар полковой училищеҕа миномёкка үөрэммитим. Наводчик буолан 1942 с. алтынньы ыйга Сталинградскай уобаласка Богаевская диэн сэлиэнньэҕэ II Украинскай фроҥҥа бастакы кыргыһыыбар киирбитим. Онтон салгыы «Косторка», «Комытын», о.д.а. хас да сэлиэнньэлэри босхолуурга кыттыыны ылбытым. Сталинград таһыгар көмөҕө иһэр ньиэмэс сэриитин утары барбыппыт. Тыастан дөйөн биир ый курдук полевой госпитальга сыппытым. Ол кэннэ Доннааҕы Ростов куорат таһыгар Сольскай дэриэбинэҕэ тимир суол станция тыгар тиийэн оборонаҕа сыппыппыт. Онтон бааһыран полевой чааска сытан, үтүөрэн баран атын чааска штурмовой этэрээккэ ручной пулеметчигынан сылдьыбытым. Сталино куорат таһыгар Малай Екатериновка сэлиэнньэтин босхолуур кыргыһыыга үһүс төгүлбүн бааһырбытым. Двигатель-Строй диэн куоракка госпитальга 4 ый эмтэнэн 1944 с. тохсунньу ыйга дойдубар уоппускаҕа диэн кэлбитим, онтон өссө биир сыл уһаппыттара. 1945 с. ыам ыйыгар кыайыы буолбута. Сэрииттэн кэлээт, урукку холкуоспар ферма сэбиэдиссэйинэн, онтон олохтоох сэбиэккэ депутакка быыбардаан нэһилиэк сэбиэтин исполкомун бэрэссэдээтэлинэн 1947 с. диэри үлэлээбитим. 1965 с. Нам оройуонун Үөдэй нэһилиэгэр көһөн кэлбитим.
П.А. Неустроев