РУБРИКАТОР
МУХИН НИКОЛАЙ НИКОЛАЕВИЧ
Мин 1941 сыл атырдьах ыйын 5 күнүгэр бэбиэскэлэнэн, атырдьах ыйын 7 күнүгэр армияҕа аттаммытым. Якутскайга икки хонон Новосибирскайга тиийбитим, онно балтараа ый устата үөрэнэн баран арҕаа атаарыллыбытым. Смоленскай уобаласка тиийэн аан-маҥнай сүрэхтэниибин ылбытым. Смоленскай куорат хотугулуу-илин өттүгэр баар байыаннай чааһы солбуйан сыппыта. Куорат немецтэр илиилэригэр киирбитэ. Биир күн арай куорат диэкиттэн газик сүүрдэн иһэр этэ. Биһиги ол массыынаны рота командирын прикаһынан кэтэһэн сытан, билиэн ылбыппыт. Онно баар офицеры командирбыт прикаһынан ытан кэбиспиппит. Суоппарын куотан истэҕинэ ытан өлөрбүттэрэ. Ити кэнниттэн өр буолбатаҕа немецтэр кимэн киирбиттэрэ. Туох да олус элбэх техника, тула өттүбүтүттэн төгүрүйэрдии кимэн киирбиттэрэ. Ити кыргыһа сылдьан биирдэ өйдөөбүппүт, төгүрүктээһиҥҥэ түбэспит этибит. Сүбэлэһэн баран төгүрүктээһинтэн тоҕу көтөн тахсарга команда бэриллибитэ. Онно икки өттүттэн өлүү-сүтүү ахсаана олус улахан этилэр. Ити кэнниттэн биһиги наар чугуруйар аатыгар барбыппыт.
Онтон Тула куорат таһыгар немец кимэн киириитин тохтоппуппут. Ол кэнниттэн Московскай уобалас Владислав диэн куоратыгар кэлбиппит. Мин бу куоракка төбөбөр бааһыран госпитальга киирбитим. Үс ый сытан эмтэммитим. Үтүөрэн бараммын Калининскай уобаласка бэйэм чааспар направление ылбытым. Ити Калининскай уобаласка илиибэр иккистээн бааһырбытым. Ол кэнниттэн сыыйыллан 1943 сыл дойдубун булбутум.
Ахтыыны суруйдум Мухин Н.Н, сэрии ветерана