РУБРИКАТОР
Мохначевскай Иван Иванович
1926 сыллаахха бэс ыйын 6 күнүгэр Бөтүҥ нэһилиэгэр төрөөбүтэ. Хатыҥ Арыы начальнай, онтон Нам ситэтэ суох орто оскуолатын үөрэнэн бүтэрбитэ. Шмидт колхозка комбайнерынан үлэлии сылдьан сэриигэ ыҥырыллыбыта. 1944 сыл кулун тутар ыйтан 1950 сыллаахха диэри Советскай аармыйа кэккэтигэр сулууспалаабыта, Аҕа дойду Улуу сэриитигэр кыттыбыта.
Сэрииттэн эргиллэн кэлэн, Дьокуускайдааҕы фельдшерскай-акушерскай оскуоланы бүтэрэн фельдшер-акушер идэтин ылбыта. Салгыы Чита куоракка Государственнай медицинскэй институту, онтон академик И.П. Павлов аатынан 1-гы Ленинградтааҕы медицинскэй институт ординатуратын бүтэрэн хирург идэтин ылбыта.
1959-1968 сылларга Аллараа Халыма, Чурапчы оройуоннарыгар хирурунан, кылаабынай бырааһынан үлэлээбитэ. Иван Иванович республикаҕа хирургическай сулууспа атаҕар туруутугар сүрүн тэрийээччинэн, сүрүннүүр хирурунан буолбута. Ол курдук 25 сыл доруобуйа харыстабылын министерствотын кылаабынай хирурунан үлэлээбитэ, республикаҕа кадр политиката, «СПИД» ГУ киинин тэрийэр методическай отделын ВИЧ СПИД утары үлэ сайдыытыгар бэйэтин кылаатын киллэрсибитэ. Хирурдар Бүтүн Союзтааҕы уонна Российскай съезтэрин делегата, Бүтүн Россиятааҕы Пироговскай общество чилиэнэ, Саха АССР хирурдарын научнай-практическай обществоларын солбуллубат председателэ.
Ийэ дойдутугар үтүөлэрин иһин «Лучшие люди России» энциклопедияҕа уонна «Трудовая слава Республики Саха (Якутия)» кинигэҕэ киллэриллибитэ.
Наҕараадалара: Орденнар: «Аҕа дойду сэриитин II степеннээх», Октябрьскай революция, «Бочуот Знага». Мэтээллэр: «Германияны кыайыы иһин», «Хорсунун иһин», «Японияны кыайыы иһин».