РУБРИКАТОР
ЫТЫК ИЭСПИН ТОЛОРБУТУМ
Хатырык нэһилиэгинээҕи «Кыһыл Талаһа» колхозка 1934 сыллаахтан Кыһыл Армия кэккэтигэр ыҥырыллар бэбиэскэни тутуохпар диэри биригэдьиирдээбитим. Сэрии буолар дьылыгар оҕуруот биригээдэтин биригэдьиирэ этим. Армияҕа 1941 сыл атырдьах ыйын 12 күнүгэр барбытым.
1942 сыл кулун тутарга диэри 91-с чааска сулууспалаабытым. Ити сыл улаханнык ыалдьан уоппуска ылан дойдубар кэлбитим. Онтон 1942 сыл ахсынньы 22 күнүгэр армиябар төннүбүтүм. Онно 283-с Кыһыл Знамялаах стрелковай полкаҕа сулууспалаабытым, бастакы сүрэхтэниини ылбытым. Курскай уобаласка Денес, Никольскай дэриэбинэлэргэ икки ый устата сэриилэспиппит. Ити кыырыктаах кыргыһыыларга икки төгүл бааһыран уопсайа балтараа ый кэриҥэ госпитальга сыппытым.
Үтүөрэн Орел куораты босхолооһуҥҥа киирсибитим. Куорат таһынааҕы нэһилиэнньэлээх пууннары биһиги сэриилэрбит ылбыттара. Михайлов куораты босхолооһуҥҥа эмиэ кыттыбытым. Черновскай куоракка тиийэрбит балтараа километр хаалбытын кэннэ өстөөх буулдьата илиибин тоһутан сэрииттэн букатыннаахтык туораабытым.
Ити кэнниттэн эйэлээх олох кэмигэр бэйэм колхозпар производство араас салааларыгар үлэлээтим. Кыайыы буолар сылыгар колхозпар биригэдьиир этим. Кэнники наар булдунан дьарыктанабын, пенсионербын.
Илья Мальцев