РУБРИКАТОР
МАКАРОВ МИХАИЛ СПИРИДОНОВИЧ
(1922-1943)
Михаил Спиридонович Макаров Көбөкөн нэһилиэгэр элбэх оҕолоох дьиэ кэргэҥҥэ 1922 сыллаахха төрөөбүтэ. Убайа Алексей (Төөһө), балтылара Фекла, Мария Макаровтар.
Сэрии иннинэ «Лена» холкуоска үлэлээбитэ. Оччотооҕу кэмҥэ колхоз ыарахан үлэтэ элбэх хайысхалааҕа: сылгы, сүөһү иитиитэ, бааһыналарга ыһыы үлэтэ, сүөһү-сылгы эбии аһылыгын бэлэмнээһин, күндү түүлээҕи бултааһын, күөлгэ-өрүскэ балыктааһын. Манна барытыгар нэһилиэк дьоно күүстэрин-кыахтарын биэрэн туран, үрдүк таһаарыылаахтык үлэлээбиттэрэ. Михаил үлэ үөһүгэр сырыттаҕына, 1942 с. от ыйын 15 к. сэриигэ ыҥырыллыбыта. Кини ЫБСЛКС чилиэнэ этэ. Сэриигэ тиийээт, 1146 артиллерийскай полка, 2-с дивизионун управлениетыгар түбэспитэ.
Михаил үөрэхтээх буолан, дьонугар ханна сэриилэһэ сылдьарын, наһаа үчүгэйдик, чуолкайдык сурук суруйан иһэрэ. Кыргыһыы хонуутуттан барыта 4 сурук кэлбитэ. Хойукка диэри ол суруктары балтылара Фекла Спиридоновналаах харыстаан илдьэ сылдьыбыттара:
1 сурук - 1.02.1943 с. Полевая почта №918.Мин 1146 артиллерийскай полка, иккис дивизионугар түбэһэн сэриилэһэ сылдьабын...
2 сурук - 20.06. 1943 с. Полевая почта №918. Мин Горькай куорат таһыгар Тороховец диэн станцияттан суруйабын. Сотору фрокка киирэбит.
3 сурук - 2.09.1943 с. Полевая почта №29984-Б. Биһиги сэриилэһэ сылдьабыт.
4 сурук - 15.09.1943 с. Полевая почта № 29984-Б. город Орша, 3 Белорусский фронт. Биһиги Орша куоракка чугаһаан турабыт, 120 километр хаалла. Орша куораттан 20 километр илин диэки баарбын.
Ити суругунан, Михаил Спиридонович суруктара быстан хаалбыттара. Сурук кэлбэт буолбута. Сэрии бүтэрин саҕана Михаил Спиридонович дьонугар «без вести пропал» диэн хара сурук кэлбитэ. Ол гынан баран бүтэһик суругуттан таһаардахха Михаил Спиридонович 1943 сыл, ахсынньы саҕаланыыта III Белорусскай фронт, фронт линиятын туорааһыныгар хабыр харсыһыыга, хааннаах кыргыска өлбүт.
Ахтыыны суруйда Петров С.А, сэрии ветерана