РУБРИКАТОР
МАКАРОВ АЛЕКСЕЙ СПИРИДОНОВИЧ
Мин 1941 сыл атырдьах ыйын 9 күнүгэр ыҥырыллан сэриигэ барбытым. Биһиги «Лена» колхозтан төрдүө буолан бииргэ ыҥырыллыбыппыт.
Миигин Чита куорат аттынааҕы «Астах» диэн дэриэбинэҕэ ыыппыттара. Сулууспабын онтон саҕалаабытым. Сотору соҕус буолан баран «79» диэн сиргэ кыратык сулууспалаан баран, Япония границатыгар баран тимир дьиэҕэ олорбуппут, сулууспалаабыппыт.
1943 сыл тохсунньу ый 18 күнүгэр фроҥҥа атаарбыттара. Калининскай уобаласка тиийэн ый аҥаарын курдук сынньабылга олорбуппут.
Великие Луки куораты ылсыбытым. Ити кыргыһыыга бааһыран госпитальга киирбитим. Үтүөрэн тахсан баран эмиэ Большой Невель диэн сиргэ барбыппыт. Пермяков Гаврил диэн киһилиин Намтан иккиэ этибит. Кэлин хас да нэһилиэнньэлээх пууннары ылаттаабыппыт. Биир бүтүн дьиэ суох этэ, оһохтор турбалара эрэ хороһон турар буолаллара. Онтон еврейдэр куораттарыгар тиийэммит, аатын бу диэн өйдөөбөппүн, ол куораты сэриилээн ылбыппыт. Калининскай уобаласка биир кыра дэриэбинэни ыламмыт, аҕыйах хонукка олорбуппут. Онтон салгыы өрүһү туорааһыҥҥа илиибэр бааһырбытым. Госпитальга 1944 сылга диэри сыппытым, эмтэммитим. Госпитальтан тахсан баран заводка үлэҕэ барбытым.
Сэрииттэн төннөрбөр «Хорсунун иһин» мэтээллээх төннүбүтүм.
Ахтыыны Кыайыы 30 сылыгар анаан оҥордум Макаров Алексей Спиридонович, 1975 с.