РУБРИКАТОР
СЭРИИ ДУОРААНА БИҺИГИ ДЬИЭ КЭРГЭҤҤЭ
Биһиги хос эһээбит Лукинов Константин Гаврильевич уонна хос эбэбит Лукинова (Ильина) Вера Ильинична туһунан кэпсиэхпин баҕарабын. Хос эһээм 1915 с, хос эбээм 1920 с. Нам улууһун Көбөкөн нэһилиэгэр күн сирин көрбүттэрэ. Оҕо эрдэхтэриттэн колхозка үлэлээбиттэрэ. Хос эһэм Нам улууһун Хатырыгын 4 кылаастаах оскуолатын бүтэрэн колхозка үлэһит быһыытынан кэлэр, сотору соҕус буолан баран фермаҕа бригадирынан ананар. Хос эбээм Түбэ 4 кылаастаах оскуолатын бүтэрэн, дойдутугар эмиэ колхозка үлэлиир. Ол сылдьан таптаһан 1940 сыллаахха ыал буолаллар. 1941 сыл бэс ыйын 22 күнүгэр фашисткай Германия сэриитэ биһиги дойдубутугар саба түспүтэ. Ол кэмтэн ылата, иккис хомуурга - 1942 сыл бэс ыйын бүтүүтэ армияҕа ыҥырыллан барыар диэри, тыылга үлэлиир. Сэриигэ ыҥырыллан барарыгар биһиги эбээбит Февралина 4 ыйдаах оҕо хаалар. Сүрдээх сэмэй, үтүө майгылаах киһи этэ диэн үөлээннээхтэрэ ахталлара. Улуу сэрии усталаах туора-тын тухары үгүс кыргыһыыларга кыттыыны ылбыт. Кини III Белорусскай фронт 2-с гвардейскай Тацинскай танковай корпус 273-с минометнай полкатыгар сэрии бүтүөр диэри минометчигынан сылдьыбыт, старшай сержант званиялаах. Александр Невскай орденнаах албан ааттаах полкатын кытта Ийэ дойдутун көмүскэспитэ, Вена, Будапешт куораттары босхолоспута, Кенинсберг, Ельня куораттар хаан тохтуулаах кыргыһыыларыгар «Хорсунун иһин» медалы ылбыта, иккис медалын Илиҥҥи Пруссия куораттарыттан биирдэстэрин иһин харса суоҕун көрдөрөн кэтит түөһүгэр иилиммитэ.
Старшай сержант К.Г. Лукинов Ийэ дойдутун иннигэр ытык иэһин чиэстээхтик толорбутун туһунан, «Төрөөбүт дойдубар» диэн хоһоонугар хоһуйан, 1945 с. Илиҥҥи Пруссияттан дойдутугар ыыппыта. Ол хоһооно оройуон «Колхоз сирдьитэ» хаһыакка ити дьыл атырдьах ыйын 24 күнүнээҕи нүөмэригэр бэчээттэммитэ:
Төрөөбүт дойдум,
Сахам сирэ,
Үөрэр-көтөр хотун Өлүөнэ,
Үрдүк сураххын суурайбатым,
Өрөгөйдөөх ааккын алдьаппатым.
1945 сыл күһүнүгэр, сэтинньигэ сэрииттэн биир да бааһа суох дойдутугар төннөн кэлбитэ. Кэлээт да колхозка үлэлээн киирэн барар. Онтон 1953 с. Дьокуускай куоракка Советскай партийнай оскуола 6 ыйдаах куурсун бүтэрэн, «Коминтерн» колхоз бэрэсэдээтэлинэн талыллан үлэлээбит. 1958-1962 сс. Көбөкөн, Арбын нэһилиэктэригэр сельсовет бэрэсэдээтэлинэн үлэлээбитэ. Ити нэһилиэктэр олохтоохторо кинини үчүгэй салайааччы быһыытынан ахталлар.
Хос эбээбит өр сылларга колхозка доярканан, ньирэй көрөөччүнэн үтүө суобастаахтык үлэлээбитэ. Сэрии кэмнэригэр эр дьону солбуйан ферма биригэдьииринэн, отчуттарга ас астааччынан үлэлээбит. Кини үлэ, тыыл бэтэрээнэ. Хос эһээбит сэрииттэн кэлбитин кэннэ өссө оҕолоноллор, эрдэ огдообо хаалан биэс оҕотун атахтарыгар туруорбута, үөрэхтээх, үлэһит ыал дьон оҥорбута. Элбэх сиэни, хос сиэннэри көрбүтэ-харайбыта. 91 сааһыгар 2011 сыллаахха ыалдьан орто дойдуттан барбыта. Оҕолорун, сиэннэрин, хос сиэннэрин чиэһинэй буоларга ииппитэ, такайбыта. Биһиги хос эһээбитин, эбээбитин олуһун диэн таптыыбыт, кинилэринэн киэн туттабыт.
Дъокуускай куорат 29№ -дээх оскуола 4 кылааһын туйгун үөрэнээччитэ Марат Омуков, Лукиновтар хос сиэннэрэ