РУБРИКАТОР
«ӨРӨГӨЙДӨӨХ ААККЫН АЛДЬАППАТЫМ»
К. Г. Лукинов биһиги кэккэбититтэн Көбөкөн сельскэй Советын исполкомун председателинэн үлэлии сылдьан өлөн туораабыт. Сүрдээх сэмэй, үтүө майгылаах киһи этэ. Улуу сэрии сылларын усталаах-туоратыгар үгүс кырыктаах кыргыһыыларга кыттыыны ылбыта. Ол тухары түөн оннун да саҕа бааһы ылбакка ардахтыы кутуллар буулдьата хайдах тумнан кэбиспитин, арыт, сэрии толоонугар охтубут атастарын-доҕотторун санаатаҕына, абаран-сатаран ахтара. «Оо, хаарыан да эрэттэр умса түспүттэрэ. Билигин бааллара буоллар, киһи аҥардастыы ымсыыра көрөр дьоно буолуо этилэр», - диэн, оргууй үөһэ тыынаат, кэпсиир буолара.
Буолак бурдуга саһара буһар, кэбиһиилээх оттор кэккэлэһэр кэмнэригэр, атырдьах ыйыгар, сэрии саҕаламмыт сылыгар, Константин Гаврильевич Лукинов арҕаа диэки аттаммыта. Кини үһүс Белорусскай фронт иккис гвардейскай Тацинскай танковай корпус 273-с минометнай полкатыгар сэрии бүтүөр диэри минометчигынан сылдьыбыта. Александр Невскэй орденнаах албан ааттаах полкатын кытта Ийэ дойдутун ытык кирбиилэрин кыр өстөөҕүттэн ыраастаабыта, Венаны, Будапеһы босхолоспута, Кенингсберг килэҥ таас куйаҕын үрэйсибитэ. Ельня куорат аннынааҕы хаан тохтуулаах кыргыһыыга «Хорсунун иһин» медалы ылбыта, иккис медалын Илиҥҥи Пруссия куораттарыттан биирдэстэрин иһин хабыр киирсиигэ харса суоҕун көрдөрөн кэтит түөһүгэр иилиммитэ.
Старшай сержант К.Г. Лукинов Ийэ дойдутун иннигэр ытык иэһин чиэстээхтик толорбутун туһунан 1945 сыллаахха Илиҥҥи Пруссияттан дойдутугар сурук ыыппыта. Оройуон «Колхоз сирдьитэ» хаһыатыгар «Төрөөбүт дойдубар» диэн ырыата ити дьыл атырдьах ыйын 24 күнугэр бэчээттэммитэ. Онно: «Төрөөбүт дойдум, Сахам сирэ, Үөрэр-көтөр хотун Өлүөнэ, Үрдүк сураххын суурайбатым, Өрөгөйдөөх ааккын алдьаппатым», - диэн Ийэ дойдутугар, төрөөбүт Сахатын сиригэр арааппардаабыта.
Константин Гаврильевич сэрииттэн эргиллэн кэлээт төрөөбүт нэһилиэгэр «Коминтерн» колхозка биригэдьииринэн, бырабылыанньа председателинэн, партийнай тэрилтэ секретарынан, Арбын, Көбөкөн нэһилиэктэригэр Совет исполкомун председателинэн өр сылларга үлэлээбитэ. Дьэ ити курдук кини сэрии уотун ортотунан ааһан, үлэ үөһүгэр сылдьан сирдээҕи дьолу билбитэ.
Петров, С. Д.,
сэрии, үлэ ветерана. Көбөкөн