РУБРИКАТОР
ЛУКИНОВ ЕФРЕМ КОНСТАНТИНОВИЧ
Ким да умнуллубат, туох да умнуллубат! Аҕа дойдуну көмүскүүр
Улуу сэриигэ кыайыыны уһансыбыт дьоммутугар үйэ саас тухары Албан аат.
Мин эһэм Константин Ефремович аҕата, мин хос эһэм Ефрем Константинович Лукинов 1943 сыллаахха 18 сааһын туолаат бэбиэскэ тутан, атын ыҥырыллыбыттары кытта Өлүөнэ өрүһү туораан Намҥа тиийэн, 4 массыынаҕа тиэллэн, Эҥсиэли хочотун кытта далбаатаан арахсыбыттар. Дьокуускайтан борохуотунан Усть-Кутунан Мальтаҕа, Бортаҕа тиийбиттэр, байыаннай үөрэҕи: строевой, огневой бэлэмнэниигэ өстөөҕү кытта өлөрсүүгэ, ыстыыгынан анньыһыыга үөрэппиттэр. Забайкальскай фронт 6-с армиятын Кыһыл знамялаах 91-с ротаҕа сулууспалаан сэриигэ бараары сырыттахтарына, товарнай вагоннарга тиэйэн Маньчжурияҕа Японияны утары сэриигэ ыыппыттар. Сэрии буола турар буолан ас-үөл тиийбэт, кырыымчык, аччыктааһын да баара. Күҥҥэ 600 грамм килиэби, буолар буолбат миини, хааһыны сииллэрэ. Тоҥуу-хатыы. Атах таҥаһа, таҥас-сап мөлтөөн эрэй бөҕөнү көрбүттэр. Киһи хараҕа кыайан ылбатынан сир-дойду уот тууспанан бүрүллүбүт. Солбуйса-солбуйса харабылга тураллар. Сотору-сотору ардыыр, хаардыыр.
Кэлин Япония утары сэриититтэн ордубут бандьыыттары, тунгуустары суох оҥорууга кыттыбыт. Саха уолаттара тулуурдаахтарын, снайпердарын, үлэһиттэрин лейтенант Лыткин хайгыыр эбит.
Хос эһэм Ефрем Константинович төрөөбүт дойдутугар 1947 с. эргиллэн кэлбит. Кэлээт да колхозка үлэлээбитинэн барбыт. Саҥа олоҕу тутуспутунан барбыт. Хос эбэбин Анастасия Кононовналыын 1950 с. холбоһон, 4 оҕолонон, барыларын атахтарыгар туруоран, үлэһит дьон оҥорон, үчүгэй олох үөрүүтүн, дьол-соргу тосхойуутун билэн бу дойдуттан 1986 с. туораабыт.
Хос эһэм «Японияны кыайыы иһин», «1941-1945 сс. Аҕа дойду Улуу сэриитигэр килбиэннээх үлэтин иһин», «Ветеран труда» мэтээллэрдээх, «Ударник коммунистического труда» званиелаах.
Эһэм барахсан сытыары сымнаҕас, үөрүнньэҥ майгылаах, аҕыйах саҥалаах буоллар да, оонньуулаах-күлүүлээх киһи эбит. Киэҥ-холку майгылаах буолан, уолаттарын бэйэтэ саахымакка үөрэппит. Улахан уола Константин Ефремович, кыра уола Алексей Ефремович нэһилиэккэ, улууска, республикаҕа биллэр саахымаччыттар.
Биһиги аймахтарбытыттан бу Улуу сэриигэ бастакы хомуурга хос-хос эһэм Лукинов Константин Павлович барбыт.
Абаҕаларым: Кривошапкин Сергей Кононович, Кривошапкин Ксенофонт Кононович, Кривошапкин Алексей Кононович, Кривошапкин Иннокентий Иванович-1, Кривошапкин Иннокентий Иванович-П, Лукинов Николай Николаевич, Лукинов Константин Гаврильевич Ийэ дойдуларын көмүскэспиттэр.
Эһэм Константин Ефремович ийэтэ Анастасия Кононовна сэрии ыар сылларыгар тыылга түүнү-күнү аахсыбакка, колхоз ыарахан үлэтигэр үлэлээбит. Дояркалыыр, от үлэтигэр үлэлиир, оттук мастарын кэрдиһэллэр, отторун бэйэлэрэ күн аайы икки-үс оҕуһунан сыарҕаҕа тиэйэн аҕалаллар.
«1941-1945 сс. Аҕа дойду Улуу сэриитигэр килбиэннээх үлэтин иһин» мэтээлинэн 1945-1947 сс. наҕараадаламмыт. Ааймахтарым: хос эбэм Кривошапкина Анастасия Кононовна, эдьиийэ Кривошапкина Татьяна Кононовна, убайдара Кривошапкин Василий Кононович, Кривошапкин Иннокентий Кононович, эдьиийим Кайгородова Прасковья Константиновна.
Кыайыыны уһансыбыт ытык дьоммор, оҕо саас оонньуутун билбэтэх 80, 90 саастаах эбэлэрбитигэр, эһэлэрбитигэр нөрүөн-нөргүй буоллун!
Ийэ дойдуга таптал баар буолан, сэрии кэмигэр хас биирдии киһи туохтан да куттаммат эр сүрэхтэммитэ. Ийэ дойдуларын оннук күүстээхтик таптыыр, кини туһугар өлөллөрүн кэрэйбэт буоланнар, өстөөҕү кыайдахтара. Хас биирдиибит төрөөбүт дойдутун таптыахтаах, дойдутугар бэриниилээх буола улаатыахтаах.
Ахтыыны суруйда хос сиэнэ IХкылаас үөрэнээччитэ
Уваров Константин