РУБРИКАТОР
Лукин Виктор Иванович
1924 сыл ыам ыйын 5 күнүгэр Бөтүҥ нэһилиэгэр, дьадаҥы бааһынай кэргэнигэр төрөөбүтэ. Виктор Иванович иккис кылааска үөрэнэ сырыттаҕына ийэтэ, төрдүс кылааска аҕата өлөннөр, бииргэ төрөөбүт убайыгар Агафон Ивановичка иитиллибитэ. 1943 сыл сайыныгар сэриигэ ыҥырыллыбыта. Ини-бии Агафон уонна Виктор Лукиннар Кенигсберг куораты ылар иһин кыргыһыыга биир кэмҥэ кыттыбыттар. Агафон кэпсиир этэ: «Кыһыыта-абата диэн быраатым Бииктэр миигиттэн чугас сэриилэспит эбит да, дьылҕа хаан биһигини фроҥҥа көрсүһүннэрбэтэҕэ». 1947 сыллаахха төрөөбүт Сахатын сиригэр Кыһыл Сулус орденнаах, «Германияны кыайыы иһин» мэтээллээх, Генералиссимус И.В. Сталин, маршал Баграмян илии баттааһыннаах грамоталардаах эргиллибитэ. Кэлин Аҕа дойду Сэриитин II степэннээх орденын туттарбыттара. Кыайыы 50 сылынан сибээстээн Кэбээйи улууһун бочуоттаах олохтооҕун аата иҥэриллибитэ.
Виктор Иванович армияттан сулууспалаан кэлэн баран, эйэлээх олох үөһүгэр түһэр. Саккырыыр оройуонугар тиийэн, маҥнай утаа кулууп директорынан, онтон лесхоһунан отучча сыл үлэлээбитэ. Туһааннаах үлэтигэр бэриниилээҕин, бэриллибит сорудахтары толорууга үтүө суобастаах үлэтин иһин 1973 сыллаахха Сангаардааҕы лесничество «Социалистическай үлэ кыайыылааҕа» диэн түөскэ анньыллар бэлиэнэн наҕараадаламмыта.
Наҕараадалара: Кыһыл Сулус орден, Аҕа дойду сэриитин II степеннээх ордена, «Германияны кыайыы иһин» мэтээл.