РУБРИКАТОР
СЭРИИГЭ УОННА ОЛОХХО
Халлаан сырдаата. Устар чуумпуну танкалар мотуордарын, тиһиликтэрин тыастара аймаата. Немецтэр төгүрүктээһини тоҕу көтөн тахсаары тиистилэр. Бастаан иһэр танк пулеметун тибиирдибитинэн бу тиийэн кэллэ. Лейтенант Лукин киниэхэ утары гранатаны элиттэ. Күүстээх дэлби тэбииттэн ол күтүр дьигис гынна, туора эргилиннэ. Иккис граната эстиитигэр умайан барда. Противотанковай орудиелар аҕыйах мүнүүтэ иһигэр фашистар хас да танкаларын суоһардылар. Харса-хабыра суох киирсии манна буолла. Бу кыргыһыыга противотанковай взвод командира лейтенант Василий Данилович Лукин төбөтүгэр улаханнык бааһырбыта.
Ол 1944 сыл атырдьах ыйыгар Румыния сиригэр этэ. Өстөөх атааката төттөрү охсуллубута. Василий Данилович ол эрэ кэнниттэн бэрэбээскилэппитэ. Эмтэнэн баран, сэриигэ эмиэ киирбитэ. Гитлеровецтар бөлөхтөрүн үлтүрүтүү кэнниттэн биһиги сэриилэрбит салгыы кимэн испиттэрэ. Өстөөҕү үүрэн-түрүйэн, кыайыы-хотуу кынаттанан, Европа норуоттарын босхолуур улуу аналларын толорон. . .
Лейтенант Лукин немецкэй-фашистскай халабырдьыттары утары кыргыһыы хонууларыгар көрдөрбүт эр санаатын уонна хорсунун иһин Бойобуой Кыһыл Знамя орденынан наҕараадаламмыта. Бу үрдүк воинскай наҕараада улахаҥҥа бэриллэр. Биһиги оройуоммутуттан кини соҕотоҕун итинник орденнаах. Биир дойдулаахпыт Бөтүҥ ыччата Калининскай, Воронежскай, 2-с Украинскай фроннар суолларынан Ржевтэн саҕалаан Ийэ дойдуну уонна Европаны босхолоспута. Сзрии кэнниттэн салгыы сулууспалаабыта. 1945 сыл алтынньыга коммунистическай партия кэккэтигэр киирбитэ. Армияттан 1946 сыллаахха кэлээт партийнай үлэһит буолбута.
ССКП Намнааҕы райкомун штатнай пропагандиһа, тэрийэр отделын сэбиэдиссэйэ. Дүпсүн МТС-тын директорын политчааска солбуйааччы, Жданов аатынан колхоз партийнай бюротун секретара. Красноярскайдааҕы үрдүкү партийнай оскуола истээччитэ, ССКП райкомун тэрийэр отделын сэбиэдиссэйэ, Среднеленскэй колхознай-совхознай производственнай управление партийнай комитетын партийнай тэрийээччи-инспектора, партия райкомун пропагандаҕа уонна агитацияҕа отделын сэбиэдиссэйин солбуйааччы - Советскай Армия командирын сэрии кэннинээҕи олоҕун суола итинник.
Армия иннинэ анал орто үөрэхтэммит, кэлин пропагандистскай курсу уонна үрдүк политическай үөрэҕи бүтэрбит, элбэҕи аахпыт, билбит коммунист, партийнай үлэһит дириҥ идейнэй итэҕэлинэн салайтарара. Кини үлэ араас боппуруостарыгар, политическай уонна хаһаайыстыбаннай үлэни дьүөрэлээһиҥҥэ партийнай позицияттан сыһыаннаһара.
Мин иннибэр «Ленин суола» хаһыат 1969 сыл муус устар 4 күнүнээҕи нүөмэрэ сытар. Хаһыат иккис, үһүс страницаларыгар подвалынан В.Д. Лукин «Коммунистическай үлэ кыайыытыгар» диэн В.И. Ленин «Улуу бачыым» диэн үлэтин 50 сыла туолуутугар анаммыт ыстатыйата баар. Ыстатыйа автора улуу сирдьит кэриэһин толоруу бүгүн советскай дьон коммунистическай үлэ иһин охсуһууларыгар көстөрүн, бу охсуһууга үчүгэйдик үлэлииргэ эрэ буолбакка, ону тэҥэ коммунистическайдыы олорорго, үлэни научнайдык тэрийэргэ, дьоннор бэйэлэрин икки ардыларыгар сыһыаннаһыыларыгар коммунистическай нуормалары олохтуурга дьулуһуу сайдарын итэҕэтиилээхтик суруйар.
В.Д. Лукин бу ыстатыйата кини өлбүтүн кэйнэ түөрт хонон баран бэчээттэммйтэ. Кини партия райкомугар үлэлии олорон күнүс эмискэ ыалдьан өлбүтэ. Ол биричиинэтэ - сэриигэ үйэ чиэппэринээҕи ыарахан бааһырыыта. Василий Данилович олоҕун тиһэх мүнүүтэтигэр диэри чиэһинэйдик, бэриниилээхтик уонна айымньылаахтык үлэлээбитэ. Хорсун сэрииһит, командир, партия идеологическай фронун активнай байыаһын олоҕо эдэр көлүөнэҕэ үтүө холобур.
И. Егоров.