РУБРИКАТОР
Лукин Иннокентий Алексеевич
1922 сыллаахха Бөтүҥ нэһилиэгэр Бүтэй Үрдэ бөһүөлэккэ төрөөбүтэ. Аҕата Көнчөй Өлөксөй, ийэтэ Лаглайа Огдооччуйа (Уваровская) 9 оҕолоохторуттан Кеша кыралара эбит. Биһиги аймахпыт билигин Дьокуускайга олорор сэрии огдообото Евдокия Егоровна Лукина уонна Бөтүҥ былыргы олоҕун өйдүүр эмиэ аарыма кырдьаҕас Наталия Романовна Никитина кэпсииллэринэн Кеша сэриигэ сылдьан тыына быстыбыт. Кеша оҕо эрдэҕинэ чобуо, сытыы тыллаах-өстөөх уолчаан үһү. Бааһынайдыы сырдык, үрдүк уҥуохтаах, бэйэтин кыанар, бэртээхэй хомсомуол уол буола улааппыт. Кеша Куонда Кэриэскэ орто оскуолаҕа үчүгэйдик үөрэммит «Ликбез» (ликвидация безграмотности) диэн оччотооҕу сэбиэскэй кэм хамсааһыныгар көхтөөхтүк кыттан сайылыктарынан, кытылларынан ыһылла олорор Бөтүҥ олохтоохторун кэрийэ сылдьан суруйарга-ааҕарга үөрэппит учуутал эбит. 19 сааһын саҥардыы туолбут уолу суостаах сэрии саҕаланаатын кытта атырдьах ыйын 5 күнүгэр 1941 сыллаахха маҥнайгы хомуурга ыҥыран боруоҥҥа быһа ыыппыттар. Москва уобалаһыгар автоматтар роталарыгар түбэһэн Саха сириттэн тиийээт да кыргыһыыга киирээхтээбит. Бааһыран Калинин (билиҥҥитэ Тверь куоракка) госпиталга ый кэриҥэ сытаат да эмиэ сэриилэспитинэн барбыт. Саллаат Иннокентий Лукин сэрии толоонуттан дьонугар суруйбут хас да суруга биһиги аймахха харалла сыталлар. Сэрии иннинэ Саха сиригэр латыыныскай алпаабыытынан суруллар этэ. Сурукка буойун абаҕам Калинин куораттан кэлин Смоленскай уобаластан дьонугар сурук ыыталаабыт. Суругар фашистары үүрэн иһэбит диэн үөрээхтиир эбит. Дөйүөр диэри ытыалаһыы, буомба эстиитин ортотугар, землянкаҕа олорон саха саллаата суруйбут суруктарын киһи харааста ааҕар. Наар Сэбиэскэй Аармыйа кыайыа, фашистары кыйдыахпыт диэн эрэл санаалаах сэриигэ сылдьаахтаабыт.
Абаҕам Иннокентий Лукин баара суоҕа 22 сааһыгар 1943 сыллаахха атырдьах ыйын 14 күнүгэр амырыын кыргыһыыга сылдьан суорума суолламыт. Кинини Смоленскай уобалас аатырбыт элбэх хаан тохтуулаах сиригэр Ельна оройуонугар Вова диэн дэриэбинэттэн хоту 2 биэрэстэлээх сиргэ көмпүттэр. Онно Мемориалга эдэр саха уола - биһиги абаҕабыт албан аата суруллубут.