РУБРИКАТОР
Лукин Агафангель Иванович
Кини дьоҥҥо-сэргэҕэ биллэр аата Агафон. Кини Бүтэй Үрдүгэр 1914 с. сэтинҥьи 17 күнүгэр төрөөбүт. Аҕата Уус Уйбаан диэн ыҥырыыга сылдьар дьоҕурдаах, мыыдарай уус киһи эбит. Бука уолаттара Агафон уонна Виктор аҕаларын утумнаан уустар, уруһуйдьуттар. Ини-биилэр оҕо саастара «Күрүөлээх» диэн кэрэ айылҕалаах сиргэ ааспыт. Агафон Куонда Кириэскэ нууччалыы үөрэммит. Оройуон салайар тэрилтэлэригэр суруксутунан үлэлээбит. Сэрии иннинэ Красноярскайга худуоһунньук орто үөрэҕэр үөрэммит. Намҥа культура отделыгар үлэлээбит. Улуус бөһүөлэктэрин киэргэтиитин кини оҥорор эбит. Оччолорго сэбиэскэй кэмҥэ көрдөрөр-аахтарар аҕытаассыйа үгүс буолан бүтүн оройуону атынан кэрийэ сылдьан былаахтары, социалистическай куоталаһыы биэс сыллаах бэтилиэккэлэр былааннарын уонна баһаам элбэх луоһуннары, былакааттары, уруһуйдары сыарҕаҕа, тэлиэгэҕэ өрөһөлүү тиэйэ сылдьан нэһилиэктэри кэрийэр, эмиэ туһугар түбүктээх үлэ буолуо. Кини кэлин Майаҕа, Ньурбаҕа театрга худуоһунньугунан үлэлээбит. Агафон Иванович 1942 с. атырдьах ыйыгар ыҥырыллыбыт. Военкомат докумуона туоһулуурунан кини Илиҥҥи Пруссияҕа Кенигберг куораты ылыы иһин хабыр хапсыһыыга кыттыбыт, ол иһин «За взятие Кенигсберга» диэн мэтээлинэн наҕараадаланар. Разведротаҕа сылдьан Краков куораты босхолоспута. Польшаттан «Орден Отечественной войны», «За Победу над Германией» наҕараадалаах дойдутугар төннүбүтэ. Маҥнайгы кэргэниттэн Людмила Дмитриеваттан 1947 с. Юра, 1949 с. Галя диэн оҕолор төрөөбүттэрэ. Намчы сэбэрэлээх учуутал идэлээх Галина эдэр сааһыгар сылдьан тыына быстыбыта. Фронтовик А.И. Лукин кыыһыттан сиэнэ Лена Валерьевна Колодезникова билигин Дьокуускайга олорор, адвокатураҕа үлэлиир. Кэлин тулаайах сиэнигэр Ленаҕа эһээтэ Агафон Иванович мэлдьи көмөлөһөр этэ.
Сэрииттэн төннөн баран Агафон Иванович Саха театрыгар, музейга худуоһунньугунан үлэлээбитэ. Мин техникумҥа үөрэнэ сылдьан биир кыһын абаҕабар билиҥҥи Пушкин аатынан библиотека таһыгар баар дьиэҕэ кыстаабытым. Онно кэргэниттэн арахсыбыт кэмэ этэ. Дьиэтигэр уруһуйдаан, араас дьиэлэр макеттарын, декорацияларын оҥорон күнү быһа сыралаһан үлэлиирэ, ол быыһыгар өлбүт бокуонньуктар төбөлөрүн хаартыскаттан көрөн үүт-үкчү оҥороро. Сүтүктээхтэр аймахтарын бюстарын оҥотторон үлэтин хаачыстыбата үчүгэйин иһин махталларын истэрим.
Сылын өйдөөбөппүн: Агафон Иванович дойдутугар Намҥа тахсан олохсуйбута. Райкомҥа үлэлиир фронтовик Василий Данилович Лукин көмөтүнэн дьиэ ылбыта, үлэҕэ тиксибитэ. Намҥа эт-үүт комбинатын дириэктэринэн, кэлин оройуон архитекторынан үлэлээбитэ. Намҥа Чумаевская Елена Николаевна диэн үтүө майгылаах огдообо дьахтары ылан олус иллээхтик орто оскуола таһыгар олорбуттара, төрөөбүт Бөтүнүгэр сайылык дьиэ тупубута. Абаҕам сайын сарайыгар өлбүт дьон киһи унуоҕар туруорар бюстарын оҥорон дьиктитик төбөтүн дьүккүҥнүү олорорун күн бүгүн курдук өйдүүбүн. Кини чугас аймаҕар биһиги аҕабытыгар Егор Алексеевичка анаан буор босхо бокуонньугу үүт-үкчү гына бюст (скульптура) оҥорбута Бөтүнҥэ «Судаарыскай киһитин унуоҕар» күн бүгүҥҥэ диэри аҕабыт тыыннаах бэйэтин саната турар.
Агафангель (Агафон) Иванович Лукин куораттан тыаҕа көһөн тахсан сымнаҕас, этиһэ, тып бырахса сылдьыбат эмчит дьахтары кэргэн ылан үйэтэ балайда уһаан 84 сааһыгар тиийэн күн сириттэн бараахтаабыта.
.