РУБРИКАТОР
КИЭН ТУТТАБЫН
Левин Лев Львович 1924 сыллаахха дьадаҥы бааһынай кэргэҥҥэ төрөөбүт. Ийэ дойдутун көмүскүү 18 саастааҕар, 1942 сыллаахха барбыт. Советскай Армия кэккэтигэр 4 сыл буһан-хатан Япония империалистарын кытта күөн көрсөн, дойдутугар 1946 сыллаахха эргиллэн кэлбит уонна Намҥа «Карл Маркс» колхозка үлэлии киирбит.
Колхозтаахтар үлэлэрин чэпчэтэргэ араас ньыманы туттан, толкуйдаан, уһанан элбэх үлэни, саҥаны айан оҥорбут механизатор эбит. Кыһынын тимиринэн уһанар, сайынын от үлэтигэр үлэлээн араас чэпчэтиилэри, от үлэтин түргэтэргэ элбэх тэрили айбыт, оҥорбут. Республикаҕа биир бастакынан толору механизациялаах оттуур звенону тэрийбит киһинэн биллэр эбит.
1967 сыллаахха Саха АССР Верховнай Советын депутатынан талыллыбыт. 1971 сыллаахха правительство саамай үрдүкү наҕараадатынан - Ленин орденынан наҕараадаламмыт. Москваҕа 1970 с. РСФСР колхозтарын советын мунньаҕар кыттыыны ылбыт.
Левин Лев Львович оройуоммут биир Ытык-мааны кырдьаҕаһа. Ол иһин Хатыҥ-Арыы нэһилиэгин Аппаанытыгар олорор уулуссабыт кини аатын сүгэр. Уулуссабытыгар И.Е. Винокуров аатынан кыраайы үөрэтэр музей, олохтоох почта отделениета, И.Д. Винокуров - Чаҕылҕан скверэ, Улуу Кыайыыга аналлаах сквер баар. Эбэм, эһэм кинилэри кытта ыаллыы олорбуттар, кини туһунан олуһун ытыктыы ахталлар, кэпсииллэр.
Айита Эверстова,
Нам 1-кы №-дээх оскуола 6-с кылааһын үөрэнээччитэ