РУБРИКАТОР
Лазарев Егор Федорович
Сэрии, үлэ ветерана. Уус-Алдан оройуонун Дойду Баатаҕайыгар (Үүнэр) төрөөбүтэ. 1942 с. Нам сэттэ кылаастаах оскуолатын бүтэрбитэ. 1943 с. аармыйаҕа ыҥырыллан, Японияны утары сэриигэ кыттыбыта. Дойдутугар 1948 с. эргиллэн кэлбитэ. Уһун сылларга холкуоска, сопхуоска механизаторынан, сибээскэ үтүө суобастаахтык үлэлээбитэ. Кэргэнэ Анастасия Васильевналыын 3 оҕону иитэн улаатыннарбыттара, оҕолоро, сиэннэрэ республика араас улуустарыгар олороллор, үлэлииллэр.
Наҕараадалара: Албан Аат III степеннээх, Аҕа дойду сэриитин I степеннээх уордьаннар, «Японияны кыайыы иһин» мэтээл.
Мин 1943 сыллаахха бэс ыйыгар аармыйаҕа ыҥырыллыбытым. Манчжурияҕа Хайлар куораты ылыыга сэриилэспитим. 152-с стрелковай полкаҕа сылдьыбытым. Дьоппуоннары кытта Хайлар куоракка улахан сэрии буолбута. Дьоппуоннар Манчжурияны сэриилээн ылан баран, билиэннэй уонна хаайыылаах кытайдарынан куорат таһыгар улахан кириэппэһи туттарбыттар этэ. Япония аармыйата сир үрдүгэр, хонууга Кыһыл аармыйаны кытта сэриилэһэртэн куттанан кириэппэскэ киирбиттэрэ. Кинилэр сэриилэрин сэбэ биһиги сэриилэһэр тэрилбитигэр тиийбэт этэ: таанкалара аччыгый, пушкаларын уостара кылгас этилэр, арай ыстыык буолар кынчааллара улахана.
Советскай аармыйа түһэрин кытта Япония императора бэйэтин сэриилэригэр бэринэргэ бирикээс биэрбит этэ, ону Хайлар куорат командованиета ылыммакка салгыы сэриилэспитэ.
Мин ити сэриигэ пушкаҕа 76 мм наводчик этим. Кириэппэс иһигэр киирэн сэриилэспитим. Хас биирдии доту уһуннук ытыалаан ылар этибит. Дьоппуоннар минометунан олус элбэхтик, харса суох ытыалыыллара. Ыраах биир үрдэлгэ вышка баара биллибитэ. Өстөөхтөр онтон кэтээн туран корректировкалаан биэрэн иһэллэр эбит. Биһигиттэн элбэх сүтүк тахсыбыта. Миигин ол вышканы ытарга бирикээстээбиттэрэ. Мин иккис ытыыбынан суулларан түһэрбитим. Миигин ити сэриигэ Атбан Аат III степеннээх уордьанынан наҕараадалаабыттара. Дойдубар 1948 сыллаахха эргиллэн кэлбитим. Кэлэн баран ханна да барбакка бу нэһилиэккэ, холкуоска, сопхуоска уонна сибээс үлэтигэр барыта 42 сыл үлэлээтим.