РУБРИКАТОР
КУТУКОВ РОМАН ГАВРИЛЬЕВИЧ
1941 сыл от ыйыгар Маймаҕаттан Кыһыл Армияҕа ыҥырыллан барбыт Роман Гаврильевич Кутуков 1942 сыл алтынньы бүтэһигэр сэриигэ хорсун быһыыны көрдөрбүтэ. Туйгун снайпер сахалартан биир бастакынан үрдүк правительственнай наҕараадаҕа тиксибитэ, «Кыһыл Сулус» орденынан наҕараадаламмыта.
Ити оччолорго улахан үөрүүлээх сурах этэ. Саха татааннаах поэта Чаҕылҕан 1943 сыл саҥатыгар киниэхэ анаан «Мин улууһум киһитигэр» диэн хоһоон суруйбута. Хоһоон аан бастаан «Кыым» хаһыакка, онтон «Колхоз сирдьитигэр» бэчээттэммитэ.
МИН УЛУУҺУМ КИҺИТЭ
Чаҕылҕан
Ыраах Саха сиригэр
Ынах, торбос уулатан,
Кустаах куобах булдунан
Күн эт тута улааппыт, -
Мин улууһум киһитэ
Бу будурбан иһиттэн,
Ааттаах киһи буолбутун
Айхаллаан ыллыыбын.
Көрбөтөхпүн көрдүм диэн
Өмүттэн турбакка,
Күөн көрсүһүү күнүгэр
Өстөөх дьонун өлөрөн,
Хас ытарын аахтара
Хара хааннарын тоьон,
Бэргэн ытааччы бэрдинэн
Биһи киһибит буолла.
Үгүс өстөөх уйатын
Үлтүрүтэ тэптэрэн,
Чугуйбат эрдээх киһи
Чулуутунан аатыран,
Элбэх эрэйи билбит
Эдэр этирик түөһүгэр
Ийэ сирин махталын
Иилинэн кэбистэ.
Ийэ сири көмүскүүр
Итии хааннаах уоланнар
Хотой сытыы харахтаах
Хорсун байыас буоланнар,
Урааҥхай саха аатын
Улуу сирим үрдүнэн
Улаханнык аатырдан
Уруй-айхат ыллылар.
Бииргэ сайдар саргылаах
Бырааттыы омуктарга
Кэккэ турар чиэспитин
Ити дьоҥҥо көрөммүн, -
Мин улууһум киһитэ
Бу будурбан иһиттэн
Ааттаах киһи буолбутун
Айхаллаан ыллыыбын.
1943.
.