РУБРИКАТОР
СЭРИИГЭ, ҮЛЭҔЭ – АТ АРҔАҺЫГАР
Кыырыктыйбыт баттахтаах, 75 хаарын уулларбыт аҕа табаарыспыт Куличкин Николай Афанасьевич 1925 с. Хатырык нэһилиэгэр колхозтаах кэргэҥҥэ төрөөбүтэ. Кини кыра сааһыттан араас үлэлэргэ эриллэн улааппыта, сытыы-хотуу, барбыт-кэлбит, элэстэммит уол оҕо этэ. Эт-хаан өттүнэн ситэн-хотон, бэйэтин кыанар буолан эдэригэр улахан дьону кытта тэҥҥэ тардыалаһар буолбута. Күнүстэри-түүннэри ыарахан үлэҕэ умса түһэн үлэлээбитэ. Ити кэмҥэ Аҕа дойду сэриитэ саҕаламмыта, онтон 1943 сыл бэс ыйыгар кини армияҕа ыҥырыллыбыта. Кини Забайкальскай байыаннай уокуругар түбэһэн Монголия кыраныыссатыгар 8-с кавалерийскай дивизия састаабыгар киирсэн сулууспалаабыта. Кини 1945 с. Япония милитаристарын утары сэриигэ кыттыбыта. Биһиги Ньукулайбыт бу түмүгүнэн «За победу над Японией» мэтээлинэн наҕараадаламмыта. Ити кэнниттэн кини 520 №-дээх үлэ батальонун састаабыгар киирсэн, 1947 с. балаҕан ыйыгар диэри билиэн тутуллубут дьоппуон саллааттарын харабыллааһыҥҥа сылдьыбыта.
Дойдутугар 1948 с. кулун тутар ыйга эргиллэн кэлэн, биир ый сынньанан баран, Хатырык сельпотугар үлэтин саҕалаабыта. Кэлин оройуон киинигэр райзагот хонтуораҕа, райсоюзка, райПОҕа араас эппиэттээх үлэлэргэ барыларыгар таһаарыылаахтык үлэлээбитэ.
Николай Афанасьевич дьоҥҥо үтүө майгытынан, үлэтигэр эппиэтинэстээхтик сыһыаннаһарынан коллективыгар улахан аптарытыатынан туһанара. Кини таһаарыылаах үлэтин түмүгэр үлэлиир тэрилтэтин администрациятын бочуотунай грамоталарынан, харчынан бириэмийэлэринэн бэлиэтэммитэ. Олоҕун доҕоро Матрена Романовналыын дьоллорун холбоон, ыал буолан 5 оҕону төрөтөн, бүөбэйдээн, кинилэри ыал оҥортоон, быр-бааччы олорон кэллилэр.
Быйылгы дьыл биһиги Ньукулайбытыгар ураты элбэх үөрүүлээҕинэн буолла. Ол курдук кини ыам ыйын 1 күнүгэр 75 сааһын бэлиэтээтэ. Ону сэргэ Аҕа дойду сэриитин кыттыылааҕа буоларын туоһулуур докумуонун ылбыта 5 сылын туолла уонна Улуу Кыайыы 55 сыллаах өрөгөйдөөх үбүлүөйүн сүһүөҕүн үрдүгэр этэҥҥэ сылдьан көрсүө. Онон ыстатыйам түмүгэр дьоллоох олоҕу уһансыбыт аҕа табаарыспытын Нам улуспотун коллективын аатыттан бу үөрүүлээх күннэринэн итиитик-истиҥник эҕэрдэлиибит уонна киниэхэ чэгиэн доруобуйаны, уһун дьоллоох олоҕу, этэҥҥэ сылдьаргар баҕарабыт! Өрүү да кэлэ-бара улусПО эдэр кадрдарыгар баай опыккыттан үллэстэ, сүбэлии-амалыы сырыт дуу, ытыктыыр-убаастыыр Николай Афанасьевичпыт.
Ф. ПРОТОПОПОВ,
улусПО профкомун председателэ