РУБРИКАТОР
КӨМҮС УҤУОҔА КӨСТҮБЭТЭҔЭ
Куличкин Семен Иванович-Дохсун мин таайым. Кини 1942 сыллаахха бэс ыйыгар армияҕа ыҥырыллыбыт. Икки сыл буолан баран өлбүтүн туһуная биллэрии кэлбит.
Таайбын кытта армияҕа бииргэ сылдьыбыт киһи ийэбэр кэпсээбитин өйдөөн хаалбыппын: «Улахан кыргыһыы буолбута. Сэмэнниин иккиэн модьу-таҕа буоламмыт снаряд таһар этибит. Өйдөнөн кэлбитим Сэмэним төбөтө, атахтара, бэйэтэ тус-туһунан сыталлара» - диэбитэ.
Семен Иванович Хатырыкка Талаһалаах эбэ үрдүгэр үөскээбит-төрөөбүт киһи. Бииргэ төрөөбүттэр тердүөлэр эбиттэр. Охонооһой диэн убайдааҕа. Кэлин икки хараҕа суох буолан өлбүтэ. Ол убайа түөрт оҕолооҕо. Онтон биир уола пенсионер Куличкин Николай Афанасьевич билигин Намҥа олорор. Эдьиийдэрэ Ааныс, Маайа сүрдээх үлэһит дьахталлар этилэр. Эдьиийэ Ааныс Уус-Алдан оройуонун Баайаҕатыгар Харчылаах Сэмэн диэн киһиэхэ эргэ тахсан Кэтириис уонна Татьяна диэн кыргыттары төрөппүтэ. Олор билигин кырдьаҕас змээхситтэр. Кинилэр оҕоларо, сиэннэрэ Уус Алдан улууһугар Сыырдаах, Баайаҕа нэһилиэктэригэр бааллар. Биир эдьиийэ Маайа Сивцев Никита диэн киһиэхэ кэргэн тахсан Хаҥырыкка олорон өлбүтэ. Кыргыттара Настя уонна Ульяна Хатырыкка олороллор.
Сэмэн колхоһугар биригэдьииринэн, сылгыһытынан үлэлээбитэ. Кини ханныктаах да сылгыны айааһыыр идэлээх эбит. Ол иһин кинини бар дьоно Дохсун диэн ааттаабыттар. Сэмэн эдэригэр от охсооччу чулуута, кыдамаһыт бэрдэ эбитэ үһү. Кэргэнэ Өрүүнэ сэрии саҕана өлбүт. Икки оҕолоохторо эдэр саастарыгар күн сириттэн маппыттар. Сэрии мэһэйдээн кыыһа Маайа кыайан үөрэммэтэҕэ. Уола Петр Куличкин киномеханик идэтин баһылаабыта, онтон суол үлэтин специалиһа буолан баран оһолго түбэһэн өлбүтэ. Кини кэргэнэ Александра Ивановна билигин Намҥа олорор, пенсионерка. Эһэтин аатын ылбыт уол Сеня лесопункт суоппара, кэргэннээх, уол оҕолоох.
Хомойуох иһин таайым Семен Иванович ханна көмүс уҥуоҕа көмүллүбүтүн билбэппит. Өлбүт биллэриитэ сүппүт. Хатырыкка оҥоһуллубут өлбүт буойуттарга аналлаах пааматынньыкка аата да суох.
Т. Аммосова, Нам с.